Shillong, Ïaïong 18
Napdeng ki 60 tylli ki konstitwensi MLA, ka Dalu konstitwensi ka dei kaba khyndiat tam ki nongthep ‘vote’ kaba don tang 22,398 ngut, katba ka Mawlai konstitwensi ka dei kaba bun tam eh ki nongthep ‘vote’ haduh 50,953 ngut ha kane ka ilekshon Lok Sabha na Shillong bad Tura Parliamentary konstitwensi.
Napdeng ki 3,512 tylli ki jaka thep ‘vote’, ka jaka thep ‘vote’ ha shnong Kamsing kaba hap ha Amlarem konstitwensi bad Phot-eitsim kaba hap ha Ranikor konstitwensi ki dei kiba rit bad duna tam ki nongthep ‘vote’ namar ki don tang 36 ngut.
Ha Tura Parliamentary konstitwensi, ka jaka thep ‘vote’ kaba duna tam ki nongthep ‘vote’ ka dei ka jaka thep ‘vote’ ha Narigre kaba hap Williamnagar konstitwensi kaba don 85 ngut ki nongthep ‘vote’.
Ka jaka thep ‘vote’ ha Shillong Parliamentary konstitwensi kaba bun eh ki nongthep ‘vote’ ka dei ha Nongspung kaba hap ha Rambrai-Jyrngam konstitwensi kaba don 1,274 ngut bad ha Tura Parliamentary konstitwensi ka jaka thep ‘vote’ ba bun eh ki nongthep ‘vote’ ka dei ka Chandmary ha North Tura konstitwensi kaba don 1,324 ngut.
Ki don 14,048 ngut ki nongpynïaid ïa ka ilekshon ha kylleng ki jaka thep ‘vote’ kiba don kumba 3,512 tylli ha baroh ar tylli ki konstitwensi.
