New Delhi, ïaïong:
Kiba bun ki bynta jong ka ri, kynthup ïa ki thaiñ ha Odisha, West Bengal, Telangana, bad Andhra Pradesh, kin sa ïohmad ïa ka jingshit kaba jur ha kine ki khyndiat sngi ban wan, la ïathuh lypa ka India Meteorological Department.
Ha kaba ïadei bad ka jingïathuh lypa ba kan sa jur ka jingshit, ka sorkar Odisha ka la pynbna ba la khang ïa ki skul naduh ka 18 tarik, Ïaïong haduh ka 20 tarik, Ïaïong.
Kumba la ïathuh lypa, la ong ba ka jingshit kan sa jur bha ha ki bynta jong ka Odisha, Gangetic West Bengal, North Konkan, Saurashtra, Kutch, ha rudnong jong ka Andhra Pradesh, bad ki bynta jong ka Telangana bad kiwei pat ki thaiñ kumba la pynbna ka khubor ba la wan na ka tnat ba dei khmih ïa ka jinglong jingman jong ka suiñ bneng.
Ka jingshit bad ka jingsngem kan sa long ha ki bynta jong ka Gangetic West Bengal, Tamil Nadu, Puducherry, Karaikal, ka thaiñ Rayalaseema, ka bynta rudnong jong ka Karnataka, Kerala, bad ha kine ki khyndiat sngi ban wan.
Ka jylla ka la sakhi ïa ka jingjur jong ka jingshit da kumba 43.6 degrees Celsius ha ka sngi Ba-ar bad la khmih lynti ba kane kan sa nang ïai bteng ha kine ki sngi ban wan.
Katba ka Baripada ka la paw ba ka la long ka jaka kaba jur bha ka jingshit, san tylli kiwei pat ki jaka ha ka jylla ki la ïohmad ïa ka jingshit kaba la palat ïa ka 42 degrees Celsius.
Ka Baripada ka la long ka jaka kaba la ïohmad ïa ka jingshit kaba 41.4 degrees Celsius ha ka lah sngi U Blei.
Ka jingshit bad ka jingsngem kan sa long ha ka jylla ha kine ki sngi ban wan, bad ka jingshit kan sa kiew da 2 haduh 4 degrees Celsius ha kiba bun ki jaka.
Ka jingshit kumba la khmih lynti, la ong ba ka la kiew ïa ka 45 degrees Celsius ha ki katto katne tylli ki jaka ha ka 18 tarik, Ïaïong haduh ka 20 tarik, Ïaïong, la ïathuh ka tnat ba dei khmih.
Ki jaka kiba la shah buh jingmaham halor kane ka jinglong ka suiñ bneng ka long na ka bynta ka Keonjhar, Mayurbhanj, Bhadrak, Balasore, Kendrapara, Jagatsinghpur, Cuttack, Khurda, Dhenkanal, Jajpur, Nayagarh, bad Kandhamal.
Ka jingshit bajur kan sa long ruh ha ki bynta jong ki distrik kiba don shaphang Shathie jong ka West Bengal haduh ka 20 tarik, Ïaïong.
Ka jingjur jong ka jingshit ka sngi, kan sa ong ruh ha South bad North 24 Parganas, Purba bad Paschim Bardhaman, Purba bad Paschim Medinipur, Purulia, Jhargram, Birbhum, Murshidabad, bad Bankura distrik, la ïathuh ki heh ka tnat ba dei khmih.
