Shillong, Ïaïong 18
Ka jingïai ap khmih lynti ki nongïalympat ka ri India na ka bynta ban khur ïa ka takma ksiar ka la poi sha kaba kut hadien ar ngut ki ‘thei ïalehkai ki la shah rem noh ha ka jingïakhun final jong ka Asian Wrestling Championships na ka bynta ban khur ïa ki takma rupa.
Kine ki kynthup ïa ka Anju, kaba la lah ban knieh noh na ka Vinesh Phogat ha ka prokram jied nongïalehkai bad ka Harshita kaba la khur ïa ka takma rupa. Ha kawei pat ka liang ka Sarita Mor ka la hap ban leit phai thylli sha la ïing hadien ba ka la shah rem noh ha ka sngi U Blei ha Bishek, Kyrgyzstan.
Ha jingïakhun jong ka kyrdan ïalehkai kaba 53kg, ka Anju ka la lah ban khur ïa ka jingjop lyngba ka technical superiority pyrshah ïa ka nongïalehkai kaba na Philippi ka Aliah Rose Gavalez bad ka nongïalehkai na Sri Lanka ka Nethmi Ahinsa Fernando.
Te kumta ka la ïakynduh ïa ka nongïalehkai na China ka Chun Lei hashwa ban kan khur ïa ka jingjop da 9-6 ha ka semi-final.
Ha ka jingïakhun final, ka Anju ka la ïakynduh pyrshah ïa ka nongïalehkai kaba na North Korea ka Ji Hyang Kim, hynrei kam shym la lah ban kamai point bad ka la duh noh ïa ka takma ksiar lyngba ka technical superiority.
Kumjuh ka Harshita ka la lah ban pynpaw ïa ka jingtbit ha kaba ka la lah ban pynliem ïa ka nongïalehkai na Uzbekistan ka Ozoda Zaripboeva da technical superiority (13-3) bad ïa ka Anastassiya Panassovich kaba na Kazakhstan da 5-0.
Hynrei ha ka jingïakhun final ka la ïakynduh jingeh ban khur ïa ka takma ksiar ha kaba ka la shah rem noh ha ka nongïalehkai na China ka Qian Jiang da 2-5 ha ka jingkhia kaba 72kg.
Ha kawei pat ka liang, ka long ka jingkyndit ïa ka ri hi baroh kawei ha kaba ka Sarita kaba la don ha ka thup jong ka kynhun ïalehkai ka ri na ka bynta ka World Championship 2021, ka la shah rem noh ha ka quarter-final da 4-8 ha ka Gantuya Enkhbat kaba na Mongolia.
