Aizawl, ïaïong:
Ki shipai ka Assam Rifles, ha ryngkat ka jingtreilang bad ka Special Narcotics Police Station, Crime Investigation Department (Crime), ha Aizawl ki la ïoh ban kurup ïa lai tylli ki synduk sabon kiba don ïa u Heroin bad shong dor T. 25 lak ha Zuangtui, Aizawl bad kem ïa uwei u briew, la ong ki pulit.
Ha ka jingpyntreikam kaba la long ha ka lah sngi U Blei la don bynta da ka jong ki shipai ka tnat Assam Rifles bad ka Special Narcotics Police Station, CID (Crime), Aizawl hadien ba la ïoh jingtip shaphang ka jingdon jong kine ki nongkhaïi drok, la ïathuh ki pulit. Kumba la antad la ong ba ka dor jong u drok ba la ïoh ban kurup uba (35.740 gm) u shong dor T. 25,01,800.
Ïa kine ki jingdih pynbuaid ba la ïoh ban kurup bad ïa u briew uba la shahkem la aiti sha ka kynhun Special Narcotics Police Station, CID (Crime), Mizoram, Aizawl ha ka lah sngi U Blei na ka bynta ban pynlong ïa ka jingtohkit, la ïathuh ki pulit.
Ha ka step jong ka sngi U Blei, ki shipai ka tnat Assam Rifles, ha ryngkat ka kynhun Special Narcotics Police Station, CID (crime), Aizawl ki la ïoh ban kurup ïa 27 tylli ki synduk sabon kiba don ïa 325.3 gm u Heroin uba shong dor `. 2,27,65,000 ha ki lai tylli ki jingpyntreikam ha Aizawl.
Ki shipai jong ka tnat Assam Rifles ki la ong ruh ba ka la kem ïa lai ngut ki briew ha ka 13 tarik, Ïaïong, 2024. Ïa kine ki jingpyntreikam la pynlong da ki shipai Assam Rifles bad Special Narcotics Police Station, CID (Crime), Aizawl, hadien ba la ïoh jingtip halor ka jingdon jong ki nongkhaïi drok.
Ka jingantad ïa ka dor ha kaba ïadei bad une u drok ba la ïoh ban kurup jong 27 synduk sabon u Heroin No. 4 ka la long T. 2,27,65,000. Ïa u drok ba la ïoh ban kurup bad ïa ki briew kiba la shahkem la aiti sha ka kynhun Special Narcotics Police Station, CID (Crime), Mizoram, bad Aizawl ha ka 13 tarik, Ïaïong, 2024.
