Shillong, Ïaïong 18
Ka bynta banyngkong jong ka jingjied ïa ki MP Lok Sabha kan long ha ka Sngi Thohdieng ha ki 102 tylli ki konstitwensi.
Kine ki kynthup ha Tamil Nadu (39), Rajasthan (12), Uttar Pradesh (8), Madhya Pradesh (6), Uttarakhand (5), Arunachal Pradesh (2), Meghalaya (2), Andaman and Nicobar Islands (1), Mizoram (1), Nagaland (1), Puducherry (1), Sikkim (1) bad Lakshadweep (1).
Nalor kitei, kan don ka jingthep ‘vote’ ruh ha mar san tylli ki konstitwensi ha Assam bad Maharashtra, saw tylli ha Bihra, lai ha West Bengal, ar ha Manipur, bad mar kawei ha Tripura, Jammu and Kashmir, bad Chhattisgarh.
Shuh shuh lashai ka sngi, kan don ruh ka jingthep ‘vote’ ha ki saw tylli ki jylla — Andhra Pradesh, Odisha, Sikkim bad Arunachal Pradesh – ban jied ïa ki MLA bathymmai ha ryngkat ki MP.
Napdeng ki kyrtong kiba don ha ka jingïakhun ha kane ka bynta banyngkong ki kynthup ïa phra ngut ki Myntri Sorkar Pdeng, arngut ki Myntri Rangbah barim, kawei ka Lat barim bad kiwei pat ki nongïalam bapawkhmat.
Kine ki kynthup ïa u Nitin Gadkari, Jitendra Singh, Kiren Rijiju, Arjun Ram Meghwal, Sanjiv Balian, ka Tamilisai Soundararajan, kaba dei ka Lat barim jong ka Telangana, u heh ka Congress na Assam, u Gaurav Gogoi bad u Myntri Rangbah barim ka Assam, u Sarbananda Sonowal.
Lah ban kdew ba ka ilekshon MP Lok Sabha mynta u snem ka don haduh hynñiew bynta bad kan kut ha ka 1 tarik Jylliew bad ka jingñiew ‘vote’ kan long haduh ka 4 tarik Jylliew.
Ki MP ba jied da ki paidbah sha Lok Sabha ki don haduh 543 ngut, bad ka kynhun ne ka seng saiñpyrthei ka donkan 272 ngut ki MP ne palat ban thaw ïa ka sorkar.
Ha ka ilekshon MP ha u snem 2019, ka kynhun UPA (United Progressive Alliance) ka la jop 45 na kitei ki 102 tylli ki konstiwensi katba ka kynhun NDA (National Democratic Alliance) ka la jop ha ki 41 tylli. Hynriew tylli na ki konstiwensi la pynbeit thymmai da ka Delimitation Commission.
Hha ka bynta kaba ar, ka jingthep ‘vote’ kan long ha ka 26 tarik Ïaïong ha ki 89 tylli ki konstitwensi, ha ka bynta kaba lai, ka jingthep ‘vote’ kan long ha ka 7 tarik Jymmang ha ki 94 tylli ki konstitwensi, ha ka bynta kaba saw, ka jingthep ‘vote’ kan long ha ka 13 tarik Jymmang ha ki 96 tylli ki konstitwensi.
Ha ka bynta kaba san, ka jingthep ‘vote’ kan long ha ka 20 tarik Jymmang ha ki 49 tylli ki konstitwensi, ha ka bynta ba hynriew, ka jingthep ‘vote’ kan long ha ka 25 tarik Jymmang ha ki 57 tylli ki konstitwensi bad ha ka bynta ba hynñiew, ka jingthep ‘vote’ kan long ha ka 1 tarik Jylliew ha ki 57 tylli ki konstitwensi.
Na ka bynta ka ilekshon MP Lok Sabha 2024 kaba ka jingthep ‘vote’ banyngkong kan long ha ka 19 tarik Ïaïong, ka Election Commission jong ka Ri India (ECI) ka la pynbna ba ki nongthep ‘vote’ ha ki 543 tylli ki konstitwensi ki don haduh 96.8 klur katba ha u snem 2019 ki la don 89.6 klur. Kane ka pyni ba hapoh san snem, ka jingdon ki nongthep ‘vote’ ka la kiew da 7.28 klur. Ki don haduh 1.84 klur ngut ki nongthep ‘vote’ ha ka rta ba hapdeng 18-19 snem katba ki ‘Third Gender’ ki don 48,044 ngut. Hadien ba ka Parliament ka la pynkylla ïa ka Representation of the People Act, 1950, ban ailad ïa ki nong India kiba shong sa sah shabar ri ba kin thep ‘vote’, kiba la pynrung kyrteng ki don 1,18,439 ngut. Nalorkata, ki don 88,35,449 ngut ki nongthep ‘vote’ kiba don jingduna ha ki dkhot met bad haduh ka 10 tarik Lber, 2024, ki don 81,87,999 ngut ki nongthep ‘vote’ kiba la palat 85 snem ka rta bad 2,18,442 ngut kiba la palat 100 snem ha ka rta.
