Shillong, Ïaïong 18
Ka jingthep ‘vote’ ban jied ïa ki MP ki ban mihkhmat ïa ka Shillong bad Tura Lok Sabha konstitwensi kan long ha ka Sngi Thohdieng ha kaba ki 22,26,567 ngut kin thep ïa ka ”vote” jong ki ha ki 3,512 tylli ki jaka thep ”vote” kiba don ha baroh ar tylli kine ki konstitwensi.
Ki paidbah kin thep ïa ka ‘vote’ jong ki ban jied ïa ki 6 ngut ki kyrtong na Shillong parliamentary konstitwensi kiba kynthup ïa u MP ba mynta Bah Vincent H Pala uba dei u kyrtong ka Congress, ka kyrtong ka National People’s Party (NPP) ka Kong Ampareen Lyngdoh, u kyrtong ka Voice of the People Party (VPP), Dr. Ricky A.J Syngkon, u kyrtong ka United Democratic Party (UDP) u Bah Robertjune Kharjahrin, ki kyrtong shimet u Prof Lakhon Kma bad u Bah Peter Shallam.
Ha Tura Parliamen-tary konstitwensi ki paidbah kin leit thep ïa ka ‘vote’ jong ki ban jied ïa ki 4 ngut ki kyrtong kiba kynthup ïa ka MP ba mynta ka Agatha K Sangma kaba dei ka kyrtong ka NPP, u kyrtong ka Congress u Saleng A Sangma, u kyrtong ka TMC u Zenith Sangma bad u kyrtong shimet u Labenn Ch Marak.
Ki nongthep ‘vote’ ha Shillong parliamentary konstitwensi ki don 14,00,411 ngut bad ha Tura konstitwensi ki don 8,26,156 ngut.
Na ki 22,26,567 ngut ki nongthep ‘vote’ ha ka Jylla, ki kynthei ki don 11,27,047 ngut katba ki shynrang ki don 10,99,517 ngut.
Ha Shillong Lok Sabha konstitwensi, ki kynthei ki don 7,16,643 ngut katba ki shynrang ki don 6,83,766 ngut.
Ha Tura Lok Sabha konstitwensi pat, ki tam ki shynrang ban ïa ki kynthei. Ki shynrang ki don 4,15,751 ngut katba ki kynthei ki don 4,10,404 ngut.
Ki jaka thep ‘vote’ ha Shillong konstitwensi kaba kynthup ïa ki 36 tylli ki MLA konstitwensi ki don 2,288 tylli katba ha Tura konstitwensi kaba don 24 tylli ki MLA konstitwensi ki jaka thep ‘vote’ ki don 1,224 tylli.
Ki pulit pahara ki don 40 pyrton kiba dei ki Central Armed Police Force (CAPF) kiba la leit sha kylleng ki jaka thep ‘vote’ ban peitngor bad pahara ïa ka jingthep ‘vote’.
Ka jingthep ‘vote’ ha ka wat banyngkong kan long ha ki 102 tylli ki Lok Sabha konstitwensi kynthup ïa ki ar tylli ki konstitwensi ha Meghalaya bad ha kiwei pat ki Jylla.
