Tel Aviv, ïaïong:
Ka Israel Defence Forces (IDF) ha ka Sngi Balang ka la pyntip ba ka la ioh ban shim ia ka jingim jong 3 ngut ki dkhot ka lehnoh Hezbollah kiba kynthup ia 2 ngut ki khlieh duh shipai jong katei ka kynhun ha ka jingleit ther bom ki liengsuiñ ka Israel sha Lebanon ha ka Sngi Ba-ar.
Katkum ka jingpynbna na ka tnat shipai ka Israel ha katei ka sngi, ki la iathuh ba u khlieh duh shipai jong ka tnat Rockets & Missiles Unit jong ka Radwan Forces na ka thaiñ West u Muhammad Hussein Shahouri, u la kyllon iap ha katei jingther bom ki liengsuiñ ka Israel ha ka thaiñ Kfar Dounine jong ka Lebanon ha katei ka sngi.
Namar katkum ka jingiathuh jong ka IDF, la ong ba u Muhammad u long u nongialam ba shyrkhei uba hukum ia ki kam thombor bad ki jingther ‘namding bad ther bom sha Israel na ki thaiñ pdeng bad thaiñ Sepngi jong ka Lebanon baroh shi katta.
Ka IDF ka la pyntip ruh ba ha katei ka jingleit thombor jong ka Israel sha Lebanon, u nongialam ka Hezbollah u Mahmoud Ibrahim Fadlallah ruh u la kyllon iap lang ha ryngkat bad kitei 2 ngut ki dkhot jong ka Hezbollah ha katei hi kajuh ka jingjia.
Kumjuh ruh la ong ba ka IDF ha ki khyndiat por ba la leit, ka la pynbna ba u Ismail Youssef Bazz uba long u nongialam ka Hezbollah ha ki thaiñ ka Ain Ebel jong ka Lebanon, u la kyllon iap ha ka jingther ‘namding ki shipai Israel sha katei ka ri.
Haba iadei bad kane, na ka liang ka Hezbollah ruh ka la pyllait ia katei ka khubor halor ka jingduh noh ia kitei 3 ngut ki nongialam ba hakhlieh jong katei ka kynhun. Hynrei, ha kawei ka liang ka Hezbollah kam shym la pynpaw pyrthei pat ia ka kyrdan bad ka rukom treikam jong kitei ki heh nongialam kiba iap baroh 3 ngut.
Ha kajuh ka por, la ong ba ka jingialang hapdeng ki heh nong-ialam ka pyrthei ban iakren ia pyrkhat halor ka thma Israel ruh ka la kut noh bad ia mynta hi ym pat don kano-kano ka khubor ne ka rai kaba mih na katei ka jing-ialang namar kim pat shym la pynpaw paidbah eiei.
La ong ba naduh ka Sngi Saitjaiñ hi ka Iran ka la phah da ki spah tylli ki drone bad ki ‘namding ban leit thombor sha Israel kum shi bynta ban pynphai kylliang ia ka jingleh jong ka Israel, ha kaba ka Israel ka la leit ther bom sha ka jaka ba don ka tnat ‘Embassy’ jong ka Iran kaba dei khmih ia ki nong Iran bad kaba don hapoh Syria. La ong ba ha katei ka jingjia, 3 ngut ki heh ka Iran kiba dei khmih ha katei ka tnat ki la duh la ka jingim bad dei na kane ka daw kaba la pynkhie bitar ia ka Iran bad pynlong ruh ia ka Iran ba kan smai ban pynhiar kput beit ia ka Israel kumba ka leh ia kitei ki heh jong ka kiba don hapoh Syria.
Ha ka step Sngi U Blei, u Lamphang ka Israel Defence Forces (IDF)- u Rear Admiral Daniel Hagari u la iathuh ba kumba 90% na ki 300 tylli ki ‘namding bad ki drone ba la phah thombor da ka Iran, la ioh ban siat pynbthei noh da ki shipai ka Israel ha katei ka miet baroh shimiet ha ka sien ba nyngkong ba ka Iran ka la thombor bad pynhiar kput ia ka Israel halor katei ka jingbakla jong ka Israel.
Hynrei ha katei ka sngi hi, u Myntri ka tnat iada jong ka Israel- u Yoav Gallant u la ong ba ka jingiakynad jong ka Israel bad ka Iran kam pat kut bad kan ym kut noh tang kumne hynrei ka Israel ruh kan leh ia kaba donkam namar katei ka jingshlur jong ka Iran ban pynhiar kput ia ka Israel ha katei ka sngi.
