Shillong, Ïaïong 18
Ka National Rifle Association of India (NRAI) ka la pynbna ïa ki kyrteng jong ki nongsiat suloi kynthei sha ka jingpyrshang na ka bynta ban ïoh rung sha ka Olympic ka ban long naduh ka Sngi Thohdieng ha Dr. Karni Singh Range, Tughlakabad.
Ka ‘thei ïalehkai kaba la ïohpdiang ïa ka takma ksiar ha ka Asian Games, ka Palak Gulia kaba la ïoh jaka ban rung sha ka Olympic ha Rio bad ka Surbhi Rao ka la ïasoh lang bad ki lai ngut ki nongsiat, katba ka Rhythm Sangwan, Esha Singh bad ka Manu Bhaker na ka bynta ka air pistol jong ki kynthei.
Lah ban kdew ba ka Rhythm, Esha bad ka Manu ki la long tang lai ngut kiba la ïadon bynta ha ka air pistol bad ka sports pistol.
Ka set kaba nyngkong jong kane ka jingpyrshang kan long ha nongbah Delhi ha kaba yn sdang shwa da ka jingïakop siat kaba 25 mitar, kumjuh ka sports pistol ki kynthei bad ka rapid fire pistol jong ki shynrang.
Kumba ka paw ka India ka la ïoh jaka haduh 16 ngut na ka bynta ban ïoh jaka sha ka Olympic ha ka rifle bad pistol bad ki 37 ngut ki nongsiat kin don hapdeng ka jingïaknieh na ka bynta ban ïoh ïashim bynta ha katei ka lympung ka ban long ha Paris mynta u snem. Kiba la ïoh rung lypa ki dei tang kito ki ri kiba pynlong ïa kane ka lympung, hynrei ka NRAI ka la buh lypa ïa ka rukom treikam na ka bynta ban jied ïa kiba kynsai sha katei ka lympung.
Kin don haduh saw tylli ki jingpyrshang, ha kaba ar tylli kin long ha Bhopal ha u Jymmang hadien ba la kut ka jingpyrshang kaba nyngkong ha Delhi. Ki lai ngut kiba kynsai kin ïoh rung sha ka wat kaba khatduh.
Te kumta na ka liang ka selection committee kan sa pynbna khatduh ïa ki kyrteng ki nongïalehkai na ka bynta ka Paris Games.
