Shillong, Ïaïong 18
Ka seng Voice of the People Party ha ka Sngi Palei ka la pynrem jur halor ka jingpynmih bad jingpynsaphriang ïa kawei ka khubor lamler kaba la kynnoh ba kane ka seng ka don jingïadei bad ka seng BJP.
Ha kane ka khubor lamler, ki nongpynmih ki la thoh ba ka VPP ka lah ban pynïasoh bad ka kynhun National Democratic Alliance ba la ïalam da ka BJP hadien ka 4 tarik Jylliew, bad la ong ruh ba ki nongïalam ka VPP ki la pan por ban ïakynduh bad ki nongïalam ka BJP. Ha kane ka khubor lamler, la buh ruh ïa ka dur jong u kyrtong ka VPP bad u President rangbah jong kane ka seng. Nalorkata, la pyndonkam ruh da ka shap jong kawei ka lad pathai khubor na Assam, ka North East Live, ha ryngkat kane ka khubor lamler.
Ha u kyrwoh khubor, u nongaiktien ka VPP, u Dr Batskhem Myrboh u la ong ba na ka liang ka North East Live News Channel ka la ai jingthoh da kaba pynshai ba kam don bynta eiei bad katei ka khubor lamler bad ha kajuh ka por, la ong ba ka jingpynmih ïa katei ka khubor lamler ka dei ba la leh da ki ‘riew shim kabu kiba don jingthmu sniew.
Haba pynrem jur ïa ka jingleh jong ki ‘riew shukor, u Dr Batskhem u la ong ba la dep ban ai da ka jingujor sha ki pulit lane ka FIR ha kaba ïadei bad ka jingpynmih bad jingpynsaphriang ïa katei ka khubor lamler.
Na ka liang ka North East Live ruh ka la pynrem jur ïa ki ‘riew shim kabu kiba la pynthohbria ïa ka kyrteng jong ka Channel bad ka la kyntu ïa ki bor ba dei khmih ba kin leh da kaba tyngeh pyrshah ïa kiba donkti.
