Shillong, Ïaïong 18
Ka Khasi Students’ Union (KSU) Mawlai Circle ka la pynkut noh ïa ka lympung ïalehkai basketball ba la tip kum ka Maitshaphrang Khasi League Basketball 2024 ha ka Sngi Palei ha madan basketball jong ka Mawlai Nongpdeng.
Ïa ka nam lahduh ha kane ka lympung la rah da ka Dubakh ‘A’ ha ka liang ki kynthei bad ka ONYX ha ka liang ki shynrang.
Ha ka jingïakhun final jong ki kynthei, ka Dubakh ‘A’ ka la lah ban pynliem noh ïa ka Dubakh ‘B’ da 51-36 point. Katba ha ka jingïakhun jong ki shynrang ka ONYX ka la jop da 76-70 point ïa ka Dubakh ‘A’.
Ha kane ka sngi la ïadon lang u President ka KSU Sengkmie u Bah Lambokstarwell Marngar kum u kongsan ha ryngkat ka jingïadon lang u Secretary ka Meghalaya Basketball Association u Bah Donald Wahlang ryngkat u General Secre-tary KSU sengkmie, u samla Donald V. Thabah kiwei ki para dkhot ka seng KSU, ki paidbah bad kiwei.
Kitei ki kynhun kiba la rah ïa ka nam lahduh ki la ïohpdiang ïa ka khusnam pisa kaba mar `40,000 bad kiba wan ba-ar ki la ïoh mar `30,000. Kumta haba kheiñ lang baroh, ka Dubakh ka la ïohpdiang ïa ka song pisa kaba ` 1 lak . Ïa ka nam Most Valuable Players la khur da u Meban Shadap na ka ONYX bad ka Larihun Warjri na ka Dubakh ‘A’.
Ïa kane ka lympung la sdang naduh ka 4 tarik mynta u bnai, kaba long shi bynta ban rakhe ïa ka sngi kyrsiew jaitbynriew ne ka “Khasi National Awakening Day”, ha kaba la wan ïashim bynta da 42 tylli ki kynhun kiba kynthup ïa 30 tylli ha ka liang ki shynrang bad 12 tylli ha ka liang ki kynthei.
Kum ban shu pynkynmaw ha ki jingïakhun semi final jong ki kynthei kiba la long ha ka Sngi Balang, ka Dubakh ‘B’ ka la pynliem ïa ka Mawkasiang Marvels da 56-23 point bad ka Dubakh ‘A’ ka la jop ïa ka Dubakh ‘C’ da 45-15 point. Katba ha ka liang ki shynrang, ka Dubakh ‘A’ ka la pynliem noh ïa ka FKJGP da 56-37 point bad ka ONXY ka la jop da 64-50 point ïa ka SYM.
Ka jingpynlong ka seng KSU ïa kane ka lympung man la u snem ka long ban plie lad ïa ki samla Khasi ba kin pyni ïa ki sap ïalehkai bad ruh ban pynkhreh na ka bynta ki lympung ïalehkai ki ban long hapoh ka Jylla lane ha kylleng jong ka ri.
