Rung semi final ka Bayern Munich & Real Madrid ha ka Champions League

Hadien ba la bteng ïa ka jingïakhun jong ka kylla miet, ka Munich ka la ïoh ban thep kol nyng-kong eh lyngba u Joshua Kimmich ha ka minit kaba 63.

Shillong, Ïaïong 18

Ka jingïaid lynti jong ar tylli ki klob ïalehkai ha ka English Premier League ki la poi noh sha kaba kut ha ka Champions League, hadien ba ki la mad ïa ka jingshah rem ha ka quarter final jong ka wat kaba ar ha ka Sngi Palei.

Kine ki kynthup ïa ka lahduh jong ka aïom ba la dep ka Manchester City, kaba dang bat mynta ïa ka kyrdan ba hakhlieh ha ka EPL bad ka Arsenal kaba don ha ka kyrdan ba-ar.

Ha ka jingïakhun quarter final (2nd leg) kaba la long ha Allianz Arena, ka Bayern Munich ka la lah ban pynpaw ïa ka jingtbit ha la ïing na ka bynta ban pynliem noh ïa ka Arsenal da 1-0 kol bad ban tam da 3-2 ha ka aggregate.

Wat la kine ki kynhun ki la ïakhaid mar 2-2 kol ha ka wat kaba nyngkong, hynrei ha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang namar ka jing-angnud hi ka long ban ïoh jingjop bad haduh kaba kut jong ka kylla step kim shym la lah ban pynkhih jar.

Hadien ba la bteng ïa ka jingïakhun jong ka kylla miet, ka Munich ka la ïoh ban thep kol nyng-kong eh lyngba u Joshua Kimmich ha ka minit kaba 63. Kane ka shi kol ka la nang pynïoh mynsiem ïa katei ka klob na Germany na ka bynta ban kynjoh sha ka thong. Ki rangïalehkai ka Arsenal ki la pyrshang kat lah kat ïai ban ïakhun tyngeh, hynrei haduh kaba kut ka jingïalehkai kim shym la lah ban pynurlong bad ban mad ïa ka jingshah rem.

Haba phai pat sha kawei pat ka jingïakhun, ka Real Madrid ka la lah ban khanglad ïa ka City ha ka jingïalehkai shabar na la ïing hadien ba ka lah ban pynliem noh lyngba ka tie-breaker da 4-3 kol.

Ha baroh ar tylli ki wat jingïakhun jong kine ki klob ka la kut da ka jingïakhaid. Ha ka wat kaba nyngkong ki la ïakhaid mar 3-3 kol bad hynnin ka sngi ki la ïakhaid biang da mar 1-1 kol.

Haba shai sha kane ka jingïalehkai, la ong ba tang mar ïasdang ka jingïakhun ka Real Madrid ka la ïoh ban pynkhih jar nyngkong eh lyngba u rangïalehkai shapdeng na Brazil u Rodrygo ha ka minit kaba 12. Haduh kaba kut jong ka kylla step ka City kam shym la lah ban pynphai bad katei ka lahduh jong ka La Liga ka dang tam da shi kol haduh kaba kut jong ka kylla step.

Dei hadien ba la bteng ïa ka jingïakhun jong ka kylla miet ba u rangthep kol ba kynsai na Belgium u Kevin De Bruyne u la lah ban pynïakhaid kylla na ka bynta ka City haduh kaba kut ka jingïalehkai.

Kumta ka Bayern Munich kan ïakynduh pyrshah ïa ka Real Madrid ha ka semi final wat ba nyngkong ha ka 1 tarik u Jymmang, katba ka Borussia Dortmund ïa ka PSG ha ka 2 tarik.