Shillong, Ïaïong 18
U Chief Electoral Officer (CEO) ka jylla, u Dr. B.D.R Tiwari, ha ka Sngi Palei u la pyntip ba ka jingkurup ba kynthup ïa ka pisa bad kiwei-kiwei ba la ïoh naduh shwa ban pynbna ïa ka jingpynlong ilekshon Lok Sabha ha Meghalaya ka la kot shaduh ka T.44.38 klur.
Haba kren sha ki lad pathai khubor, u Dr. Tiwari u la ong ba na katei ka T. 44.38 klur, T. 33.45 klur ka dei kaba la kurup hashwa ka jingpynbna ïa ka ilekshon lane hashwa ban pynjari ïa ka Model Code of Conduct (MCC), bad T. 10.93 klur ka dei ha ka por ba la pynjari ïa ka MCC, kata, naduh ka 16 tarik Lber bad haduh mynta ka sngi.
Kane ka T. 44.38 klur ka kynthup naduh ka pisa, jingïoh kurup kyiad, drok, mar ki mat ban pynbiej ïa ki nongthep ‘vote’, bad kiwei-kiwei kiba la mana da ki bor pynïaid ilekshon.
Nalorkata, u CEO u la ïathuh ba ki la don saw tylli ki jingujor ejahar lane FIR ha kaba ïadei bad ka kam ïalap ilekshon naduh ba la sdang bad haduh ka 17 tarik Ïaïong.
U Dr. Tiwari u la ong ruh ba ki bor pynïaid ilekshon ki la ïoh ïa 67 tylli ki jingujor ba la ai lyngba ka rynsan NGSP bad 9 tylli lyngba ka C-Vigil App. U la ong ba ïa kine ki jingujor baroh la dep ban pynbeit lut.
Ha kajuh ka por, u CEO u la pyntip ba ki la don 1,619 ngut ki nongshong shnong kiba la shah pynngat ha ki kyndon jong ka Criminal Procedure Code (CrPC) katba 12,912 tylli ki tiar siat la leit ai sha ki thanat pulit. Na kine, 773 tylli la pyllait hadien ba la peit bniah da ka kynhun bakyrpang.
