Shillong, Ïaïong 18
U President ka Khasi Students’ Union (KSU) Sengkmie u Bah Lambokstarwell Marngar u la pynpaw ka jingsngew lehraiñ ba ki samla Khasi kim don ïa ka jingkut jingmut ha ki kam ïalehkai wat la ki don shisha ïa ki sap ïalehkai ba kyrpang.
Haba ai jingkren ha ka jingpynhap pyrda ïa ka lympung ïalehkai basketball ba la tip kum ka Maitsha -phrang Khasi League Basketball 2024 ba la pynlong da ka KSU Mawlai Circle ha ka Sngi Palei, utei u nongïalam ka KSU u la pynpaw ïa kitei ki kyntien hadien ba u la ïakynduh dangshen ïa uwei na ki rangïalehkai ba paw ka Jylla uba la ong ba ki nongïalehkai Khasi ki long kiba don ïa ki sap ïalehkai ba kyrpang, hynrei kim don pat ïa ka jingkut jingmut ban nang pynjanai shuh shuh ha ki kam ïalehkai jong ki.
“Ym lah ban len ba ngi ki Khasi ngim don ïa ka rynïeng kaba jrong, hynrei nga sngew ban ong ba u sohmynken khnai u kham sap ban ïa kiwei. Te kumta nga pynshlur ïa phi ki para samla ba phin kiar na ki bym pynmyntoi, hynrei phi dei ban trei shitom khnang ba phin long kum ki khlur ha ka Jylla bad ruh wat ha ki lympung ïalehkai shabar jylla ruh kumjuh,” u la bynrap.
“Lyngba ine i lympung i barit ngi khmih lynti ba kin nang mih ki samla ïalehkai kiba kynsai ki ban tbeh jingshai ïa ka ri bad ka jait bynriew ha kino-kino ki lympung.”
Haba ïadei bad jingwan ïashim bynta ki kynhun ïalehkai ha ka Maitshaphrang Khasi League Basketball kiba la don khambun mynta u snem, u Bah Marngar u la ong ba ka jingwan shim bynta ka jong ki ka la dei lypa ka jingjop, kampher ba ki don tang mar kawei ka kynhun ha ka liang ki shynrang bad kynthei ki ban rah ïa ka nam lahduh.
“Ngi khmih lynti ba ha ki snem ki ban nang wan kin dang mih shuh shuh ki kynhun ki ban wan ïashim bynta bad ruh ba kin dang mih shuh shuh ki nongïalehkai kiba kynsai ki ban tyngshaiñ ym tang ha ka Jylla hynrei wat ha ka ri hi baroh kawei,” la bynrap u President.
Shuh shuh u Bah Lambokstarwell u la pynshlur ïa baroh ki samla ba kin mih shakhmat ban ïasnoh kti lang ha ka ban rat dyngkhong ïa ki jingsniew kiba la sdang ban jyllei hapoh ka Jylla. “Ka jingima mynta ka long ba u drok u la sdang ban jyllei bad ban pynngop ym tang ha ki samla shynrang, hynrei mynta u la sdang ban suhthied sa ha ki samla kynthei. Te kumta ngi pan ka jingïatrei lang bad phi ki para samla, kumjuh ki shnong ki thaw na ka bynta ban rad dyngkhong ïa une u jingdih uba sniew uba la pynngop ïa shibun ki samla jong ngi.”
