Dubai, ïaïong:
Katkum ki khubor la ong ba ka thaiñ Middle East jong ka Dubai ha ka Sngi Balang ka la shah lynshop ha u ‘lapbah bad ka ‘eriong kaba khlaiñ kaba la wanrah ia ka jingshlei um kaba jur ha katei ka nongbah bad kaba katei ka nongbah ka la hap ban pynsangeh noh ia baroh ki kam-ki jam bad khamtam ki liengsuiñ kiba dei mih na katei ka nongbah.
Hynrei la ong ba wat hapdeng utei u ‘lapbah uba jur ba katei ka nongbah ka la sakhi, pynban ki don katto katne ki liengsuiñ kiba la shu pynpher bad pynjlan noh ia ka por mih na katei ka nongbah bad don pat kiba la hap ban pynsangeh noh syndon.
Haba iadei bad kane, ki bor pyniaid jong katei ka nongbah ki la maham ia ki paidbah ba ki dei ban kiar na ka jingleit sha katei ka nongbah ha kum kane ka por ba ka jinglong-jingman bad ka leit ka wan ha katei ka nongbah kam pat long kylluid ne don jing shngaiñ ia ki paidbah ban leit ban wan ha katei ka nongbah.
Na ka liang ki bor pyniaid jong katei ka Kad Liengsuiñ na Dubai ki la pyntip ba ia mynta hi ki dang ialeh katba lah ban pyniaid ia ka leit ka wan jong ki liengsuiñ na katei ka jaka hynrei ki paidbah nongleit-nongwan ki dang hap ban iai shah shipor katba ka jinglong-jingman kam pat biang bha.
La ong ba ki don kumba 500 tylli ki liengsuiñ kiba dei ban mih bad wan hiar sha katei ka Kad Liengsuiñ kiba la shah pynphai noh bad kumjuh ruh kiba la shah pynsangeh noh syndon namar katei ka jingbym biang jong ka suiñ bneng ha katei ka sngi.
Ki bor pyniaid katei ka Kad Liengsuiñ ki la iathuh ruh ba ki don 15 tylli kiba dei ban leit hiar sha Dubai la pynsangeh noh bad 13 tylli pat kiba dei ban mih bad leit sha India ruh la hap ban pynsangeh noh.
Kumjuh ruh la ong ba ym tang kitei ki Kad Liengsuiñ kiba shah ktah na katei ka jingslap jur hynrei wat ki jaka iew ‘Mall’ kiba heh ruh la hap ban khang khyrdep noh namar ka jingshah tap um.
Kumta katei ka jingslap jur bad jingshlei um ka la ktah ruh ia ka thaiñ ba marjan jong ka Dubai kum ka Bahrain.
Namarkata, ki bor pyniaid katei ka nongbah ki la pynbna ba la rai ban khang noh shwa ia baroh ki jaka pule kum shi bynta ban tehlakam ia ki jingma kiba ap na ka jingsniew ka suiñ bneng.
Kumta la ong ba katei ka ‘eriong ka la leit ban iaid lynti ia ka UAE bad ka Bahrain hashwa ba kan leit ban lynshop bad pynkut ha Oman bad kaba la shim ruh ia ka jingim jong ki 18 ngut na katei ka nongbah.
Ki tnat ba dei khmih suiñ bneng ki la pyntip ruh ba utei u slap u long u lap-bah uba jur tam u bym ju ioh mad ne sakhi shuh naduh ki snem 1949 bad hashwa ka jingwan mih jong ka UAE ha u snem 1971.
