Shillong, Ïaïong 18
Ka Marjorie Noreen Dunai kaba shong ba sah ha Kynjat Phutbol Lumparing bad kaba dei ka nongseng ïa ka Gracious Givers Foundation ka la ïoh ban rah ïa ka nam lahduh ha ka Mrs. Global International 2024 bad ka la ïoh ruh ban khur ïa ka nam kum ka Best In Resort Wear.
La pynlong ïa kane ka jingïakob ‘thei bhabriew bad ‘rang kynsai ïa kaba la tip kum ka Global Man & Woman International 2024 da ka Koda Entertainment ha Kathmandu, Nepal.
Ha katei ka jingïakhun ki la don haduh 30 ngut ki nongwan ïashimbynta na kylleng satlak ka pyrthei kum na Malaysia, Philippines, Sri Lanka, Nepal, India bad kumta ter-ter kaba la pynlong naduh ka 28 tarik u Lber haduh ka 1 tarik u Ïaïong 2024.
Katba ka samla Eulaila A Malngiang kaba shong ba sah ha Malki, Shillong ka la ïoh ban phong ïa ka pansngiat kum ka Miss Ambassador 2024 bad u samla George F Mawblei pat ba shong ba sah ha Nongrmai, Mairang u la ïoh ban phong ïa ka pansngiat kum u Mr. Ambassador 2024, katba u samla Boltijoy Jyrwa Nongsiej ba shong ba sah ha Motinagar, Shillong u la ïoh ban rah ïa ka nam kum u Mr. Petite 2024 bad ïa ka nam kum u Best Resort bad ha ka liang ki hep barit pat, u heprit Champ Suchiang u la ïoh ban rah ïa ka nam lahduh ha ka liang ka Kids Category.
