Shillong, Ïaïong 19
Kum shi bynta ban pyndonkam hok bad pyntreikam hok ïa ka bor ha ka ri synshar paidbah, ka Rapido kaba dei ka lad ai jingshakri paidbah lyngba ki arshaka ka la shim ïa ka bynta ban ai jingshakri ei ïa ki paidbah ha kylleng ka ri ha ka jingpyllait ïa ka ‘Sawaari Zimmedariki”.
Ka Rapido ha ryngkat bad ka jingïatreilang bad ka Meghalaya State Election Commission, ka la pynkhreh ïalade ban ïadonbynta lang ha ka jingpynlong ïa ka ilekshon MP shapoh ka Lok Sabha hapoh ka jylla Meghalaya. Kumta kum shibynta ka jingïaid lynti jong kane ka kompani, ka Rapido kan sa ai ka jingshakri ïa ki paidbah kiba leit thep ‘vote’ khlem da donkam ban siew pisa ha Shillong ha ka 19 tarik u bnai Ïaiong 2024.
Ha katei ka sngi thep ‘vote’, ki paidbah kiba leit thep ‘vote’ kin ïoh ïa katei ka kabu ka ban ym donkam siew pisa sha kitei ki nongñiah arshaka kiba kamai hapoh ka kompani Rapido da kaba ki pyndonkam ïa u code “VOTENOW” ban pyndonkam ïa ka hok synshar paidbah jong ki. Ka thong jong kane ka jingbym donkam ban siew pisa ïa kitei ar shaka na ka bynta ban leit buh bad leit on ïa ki paidbah nongthep ‘vote’ ka long ban ïarap ïa ki nongshong shnong ha kaba kin ïoh ban thep ïa la ki ‘vote’ bad ban pyntikna ba ka jingthep ïa ki ‘vote’ kan long kaba bun.
Ïa kane ka sienjam kaba la leh da ka Rapido ka long ha baroh kawei ka Ri ha kaba ki don haduh 10 lak ngut ki nongkamai ar shaka kiba don hapoh ka Rapido ha kylleng ki 100 tylli tam ki nongbah ki ban ai jingshakri ei khlem donkam siew ïa ki nongthep ‘vote’ ha ka sngi ka jingthep ‘vote’.
Ka jingïateh jong ka Rapido bad ka Meghalaya State Election Commission ka long ban pyni ïa ki jingkular ba kum ka kompani ka kwah ban wanrah ïa ki jingkylla kiba bha na ka bynta ka imlang ka sahlang kaba bit ba biang.
U Co-founder jong ka Rapido, u Pavan Guntupalli u la ong ba ka jingshim jong ka kompani ïa katei ka sienjam ka long ban pyntikna ba man iwei-pa-iwei nongthep ‘vote’ ha Shillong ki lah ban pyndep hok ïa ka kamram jong ki ha ka ri synshar paidbah da kaba ki leit ban thep ïa la ka ‘vote’ ha ka sngi thep ‘vote’.
“Da kaba ngi ai jingshakri ei ïa ki paidbah khlem da donkam siew pisa, ngi wanrah ïa kata ka synshar paidbah kaba dei ban long. Ki nongkamai Rapido jong ngi hapoh Meghalaya ki long kham palat ban ïa ki nongñiah, ki long kum ki nongmihkhmat kiba trei bad weng ïa ki jingeh jong ki paidbah nongshong shnong, ban pyntikna ba ka jingthep ‘vote’ kan long kaba kiew bad ban kyntiew ïa ka jinglong jingman ka jingthep ‘vote’ khamtam ba ka Ri India ka la dei lypa ka Ri synshar paidbah kaba heh hapoh ka pyrthei”, la ong u Pavan.
Lyngba kane ka sienjam, ka Rapido kan dang ïai bteng ban wanrah ïa ki jingkylla kiba bha bad kiba don jingmut ha ka jingim jong ki paidbah ha kylleng ka Ri. Kane ka sienjam ka long ban pyni ïa ka jingshakri jong ka Rapido ban pynshlur bad ban pynkupbor ïa ki nongthep ‘vote’ ka jylla Meghalaya ba kin pyndonkam hok ïa la ka ‘vote’ da kaba ki mih ban leit thep ïa ki ‘vote’ jong ki ha ki jaka bapher-bapher.
