Jowai, Ïaïong 19
Ka jingthep ‘vote’ ban jied ïa u nongmihkhmat bathymmai sha ka Lok Sabha ha ka Sngi Thohdieng ha ki hynriew tylli ki jaka thep ‘vote’ lane ‘Polling Station’ kiba don ha ki thaiñ khappud jong ka Meghalaya-Assam ha West Jaiñtia Hills ka la ïaid beit ïaid ryntih hapdeng ka jingpahara kaba jur bad kam shym la don satia kano-kano ka jingpynthut na kano-kano ka liang naduh ka por mynstep haduh ka por janmiet ba la kut ka por thep ‘vote’.
Ha ka shnong Mukroh kaba hap hapoh 4-Mowkaïaw Assembly Konstitwensi ka don kawei ka Polling Station na ka bynta ki kynthei bad kawei ka Polling Station na ka bynta ki shynrang.
Tang 431 ngut ki shynrang na ka 821 ngut ki la wan thep ‘vote’ katba na ki 810 ngut ki kynthei ki nongwan thep ‘vote’ ki long tang 476 ngut.
Katba ha shnong Khanduli kaba hap hapoh 1-Nartiang Assembly Konstitwensi ki don ar tylli ki Polling Station, mar kawei na bynta ki kynthei bad shynrang, bad ha ki polling station ba don ha Khanduli, ki nongwan thep ‘vote’ ki long na Khanduli, Myn-i, Umshangiar bad Umplu.
Na ka 1,004 ‘vote’ jong ki shynrang, ki nongthep ‘vote’ ki long haduh 707 ngut katba na ka 975 ‘vote’ jong ki kynthei, ki nongthep ‘vote’ ki la long 751 ngut.
Sa artylli pat ki Polling Station ki long ha shnong Tum Tum hapoh kaba hap ha 4-Mowkaïaw Assembly Konstitwensi bad ki dei na bynta ki nongthep ‘vote’ na Tum-Tum, Myntangtihwieh, Pdienlapatein, Psiar, Khatkasla, Mowluber.
Ki la don 467 ngut ki shynrang kiba la wan thep ‘vote’ na ka 996 ngut bad 431 ngut ki kynthei ki la wan thep ‘vote’ na ka 1,056 ngut.
