Mawkyrwat, Ïaïong 19
U kyrtong ka Regional Democratic Alliance (RDA) jong ka seng UDP bad HSPDP, u Bah Robertjune Kharjahrin, hadien ba u la dep ban thep ‘vote’ ha Mawthawpdah Polling Station ha ryngkat ka kurim jong u ka Kong Ibariti Lyngdoh ha ka Sngi Thohdieng u la pynpaw ïa ka jingkmen ba u la ïoh ban pyndep ïa ka hok ka jong u ban thep ‘vote’.
Haba kren sha ki nongthoh khubor hadien ka jingthep ‘vote’, u la ong ba u don ka jingkyrmen kaba skhem ba un jop ïa ka ilekshon ha kane ka kynti kaba mynta lyngba ka jingïatreilang kine ki artylli ki seng saiñpyrthei.
U Bah Robertjune u la ong ruh ba um kwah ban beiñ ne ïaroh ïano-ïano. U la ong pat ba ki nongaireng ha kane ka ilekshon ki long kiba biang suda bad ka shong sa ki paidbah ba kin pynshong nongrim ban thep ïa ka ‘vote’ ka jong ki.
Shuh shuh u ai khublei ruh ïa baroh ki nongthep ‘vote’ jong ka Shillong Parliamentary Constituency kiba la kyrshan ïa u bad kumjuh ïa kito ki bym shym la kyrshan bad u la kular ba lada u poi sha ka thong un mih?hmat lang ïa baroh na ka bynta ban kren ïa ki jingeh ki paidbah ha Dorbar Bah Parliament.
