Shillong, Ïaïong 19
Kan long ka jingduh nong kaba khraw namar ar ngut ki nongïalympat jong ka ri ki la duh ban ïashim bynta ha ka Asia Olympic Qualifiers ka ban long ha Bishkek wat la kitei ‘rang ïalympat ki long kiba tbit hapoh ka ri.
Kine ‘rang ïalympat ki long u Deepak Punia bad u Sujeet Kalakal kiba la duh ïashim bynta na ka daw ba kim shym la poi ha ka por kaba biang ban thew jingkhia ïalade namar ba ki la poi slem ha Dubai kaba long ka nongbah jong ka Kyrgyzstan.
Baroh ar ngut kitei ki nongïalympat ki la lah ban poi suk ha Bishkek hadien ba ki la sahkut ha kad liengsuiñ Dubai na ka daw ka jingjur slap bad ka jingshlei um. Kumta ki la poi slem bad kim shym la ïoh shuh ban thew jingkhia ïalade ha shwa ba kin ïoh ban ïashim bynta,” la pynpaw ki khubor.
Kat kum ki khubor la ong ba ki bor pynïaid kim shym la ailad shuh ban thew jingkhia wat la na ka liang ki coach jong ka kynhun ïalehkai ka ri ki la buh ka jingkyrpad.
U Punia (86kg), uba la khur takma ha ka Tokyo Games bad u Sujeet (65kg), ki la don ha lynti ban leit sha Bishkek na ka bynta ban ïashim bynta ha ka Asia Olympic qualifiers, kaba long ka lympung ïaknieh kaba ar ban ïoh rung sha ka Paris Olympics. Hynrei kiba bun na ki liengsuiñ kiba mih na Dubai ki la hap ban sangeh lane ban pynslem na ka daw ka jingshlei um ha ka kad liengsuiñ.
Ïa kine ar ngut nongïalympat la synran lang da u coach uba na Russia u Kamal Malikov lem bad u physio u Shubham Gupta, kiba la hap ban thiah ha madan bad kim shym la ïoh ïa ka bam kaba biang na ka daw ka jingshah lynshop ha u slap uba jur ha Dubai.
“Te kumta ki la sah-kut ha kad liengsuiñ Dubai naduh 16 tarik mynta u bnai bad kane ka jingïaknieh ban ïoh rung sha ka Paris Olympics ka la don hapdeng ka jingartatien namar ka jingïa-khun kan sdang ha ka sngi Saitjaiñ. Kine ki ‘rang ïalympat kim shym la ïoh liengsuiñ ban leit sha Bishkek bad dei kane kaba pynkhuslai ïa nga,” la pynpaw u Dayanand Kalakal, uba long u kpa jong u Sujeet.
Kumba ka paw u Punia bad u Sujeet ki la shah hikai ha Dagestan, Russia naduh 2 haduh 15 tarik mynta u bnai bad ki la rai ban mih na Makachkala ban leit sha Bishkek lyngba ka Dubai.
Ka lympung ïaknieh kaba khatduh ban ïoh rung sha Paris kan long ha ka World Qualifiers ka ban long ha Turkey ha u Jymmang.
