Shillong, Ïaïong 19
Hadien ka jingthep ‘vote’, ki kor thep ‘vote’ lane EVM bad VPPAT mynta la buh ha ki 13 tylli ki jaka kiba khlaiñ bha ka jingpahara (strong room) bad yn ap haduh ban da poi ka sngi ñiew ‘vote’ kata ha ka 4 tarik u Jylliew.
U Chief Electoral Officer (CEO) ka Jylla, u Dr. B.D.R Tiwari, u la ong ba na kine ki 13 tylli ki jaka buh ïa ki kor thep ‘vote’, 8 tylli ki don hapoh Shillong Lok Sabha konstitwensi bad 5 tylli ki don hapoh Tura Lok Sabha konstitwensi.
U la ong ba ïa kine ki jaka ba buh ïa ki kor thep ‘vote’ yn pynkhlaiñ ïa ka jingpahara da ki pulit Central Armed Police Force (CAPF) bad kine ki 13 tylli ki jaka ba buh ïa ki kor thep ‘vote’ kin dei ruh ki jaka ñiew ‘vote’.
Ha kawei pat ka liang, u CEO u la ong ba wat lada ka jingthep ‘vote’ ka la dep ha kine ki ar tylli ki Lok Sabha konstitwensi, hynrei ki kyndon pyrkhing ilekshon lane ‘Model Code of Conduct’ ki dang bteng ban treikam ha Meghalaya tad haduh ban da dep ñiew ‘vote’.
U la ong ba ki bor pahara kin dang bteng ban peitngor ïa ka jinglong-jingman bad kin dang don sa katto katne ki pulit CAPF kiba dang dei ban don ha kane ka jylla na ka bynta ka jingïaid beit ka jingñiew ‘vote’.
