Shillong, Ïaïong 19
U General Secretary ka UDP Sengkmie, Bah Jemino Mawthoh, u la ong ba ka jingkiew rynsan u Bah Lambor Malngiang, MDC ka Nongkrem konstitwensi ban ïalap ilekshon ïa ka Kong Ampareen Lyngdoh kum ka kyrtong NPP sha ka ilekshon MP Lok Sabha ha ïew Smit bad Malki ka la pyntikna ba um don shuh ha ka seng UDP.
“Ha kine ki sngi haba ki MDC ki la ujor ïa u Bah Lambor, ngi kum ka seng ngim lah ban shim kyrkieh ïa ka jingpynshitom namar ngi hap ban pan jingshai halor ka jingleit kyrshan ïa ka seng NPP ha KHADC” u la ong.
U la ïathuh haba ka seng ka la ïakren bad u Bah Lambor, u dang kam beit ba u dei u dkhot ka UDP. Kumta ka seng ka shim beit ba u dang don bad la ka kynhun.
U la ong ba ka jingmih pyrthei u Bah Lambor ban kyrshan ïa ka Kong Ampareen Lyngdoh ha kane ka ilekshon MP ba dang shu dep ka la pynlong ïa ka seng ban pyntikna ba um don bynta eiei shuh ha ka seng UDP.
“Ngam donkam shuh ban pan jingshai na u Bah Lambor haba ka la mih ha ki lad pathai khubor, hynrei ka la pyntikna ba um dei shuh u dkhot ka UDP” u la ong.
Halor ka jingmih kynsan u Bah Lambor shwa ka sngi thep vote, u Bah Jemino u la ong ba ki nongïalam ki lah ban leit ne ki lah ban wan ha ka seng UDP, hynrei ki paidbah kin nym khih, kin kyrshan beit ïa ka seng UDP namar kane ka dei ka seng kaba la rim bha.
Kum ban shu pynkynmaw, u Bah Lambor Malngiang u la ïakhun na ka seng UDP ha ka ilekshon MLA 2023 na Nongkrem konstitwensi. Phewse mar shu shah rem u la leit ban ai jingkyrshan ïa ka seng NPP ha KHADC hadien ba ka UDP ka la shong ha ka liang pyrshah.
