Shillong, Ïaïong 18
U Bah Nolip Lyngdoh, uba dei u trai jaka, u la ïathuh ba u la ïoh pdiang tang T.10 lak ka pisa na ka T.35 lak kaba dei ka bai jaka kaba la thied da ka Khasi Hills Autonomous District Council (KHADC) kaba dei ha Mawkyrwat, South West Khasi Hills District.
U Bah Nolip u la ïathuh ba ka jingïakut ha u snem 2014 ha ka por ba long CEM u Bah Ardent Basaïawmoit ban thied jaka kaba 11,000 sq.ft. tam ha ka dor T.300 shi sq.ft., hynrei ka KHADC lyngba ka jingïasoi bad u Secretary ki dang siew tang T.10 lak kum ka bai boina (advance), hynrei haduh mynta la ïaid 10 snem kam shym la siew lut ïa ka pisa kaba dang sah sa T.25 lak.
U la ïathuh ba ka jingbym lah shuh ban siew dep ka KHADC ïa ka pisa ka dei hadien ba la khyllem noh ka shuki u Bah Ardent ha kito ki snem.
“Ngam kwah ban ïakren halor ka jingïakynnoh mar kylliang hapdeng u Bah Ardent Basaïawmoit bad u Bah Donkupar Sumer ha kane ka jingïalap ilekshon MP,” u la ong.
U Bah Nolip u la ong ruh ba mynshwa u buh dor T.300 shi sq.ft., hynrei mynta la ïaid 10 snem ka dor kan dei noh da kawei katkum ka juk.
U la ong ba um tip na kaei ka daw ba ka KHADC kam siew dep shuh ïa ka pisa kaba dang sah haba ka la dep siew ïa ka pisa haduh T.10 lak.
Namarkata, u la pyntip ba lada ka KHADC kam siew dep ïa ka pisa kaba dang sah, ka pisa kaba la dep siew bai boina kan ïoh ha u kum u trai jaka, hynrei un aiti ïa ka jaka tad ynda la dep siew lut ïa ka pisa.
