Shillong, Ïaïong 19
U Myntri ka Sorkar Jylla bad uba dei ruh u nongmihkhmat ka 18-West Shillong Constituency na ka United Democratic Party (UDP), Bah Paul Lyngdoh, u la ong ba ka jingïashim bynta jong ki paidbah ban thep ïa ka ‘vote’ na ka bynta ban jied ïa kyrtong MP Lok Sabha ka dei u thied snam jong ka synshar paidbah.
“Ka jingïashim bynta jong ki paidbah ha ka jingthep ‘vote’ ka dei u thied snam jong ka synshar paidbah bad kaba ai jingkmen ïa nga kum uwei na ki nongïalam jong kane ka jylla ban ïohi ïa ka jingmih bad ka jingïashim bynta shitrhem jong ki nongthep ‘vote'”, la ong u Bah Paul.
Haba ïoh ban ïakren bad une u nongmikhmat hadien ba u la wan thep ïa la ka ‘vote’ ha ka 19 tarik u Ïaïong hapoh ka Dorbar Hall jong ka shnong Lumkshaid Lower Mawprem, u la ong ba kane ka jingmih bad ka jingwan ïashimbynta jong ki paidbah shakhmat ban thep ïa ki ‘vote’ ka ai jingkyrmen ïa u kum uwei na ki nongïalam jong kane ka jylla bad kaba kongsan ka long ba ym dei ban peit mano ban jop ïa ka ilekshon hynrei ka jingïashim bynta jong ki paidbah ka dei ka jingjop jong ka Ri synshar paidbah.
“Kaba kongsan ka long ba ym dei ban peit mano ban jop ha ka ilekshon, hynrei ka jingïashim bynta jong ki paidbah hi ka dei ka jingjop jong jingsynshar paidbah”, la ong u Bah Paul.
U Bah Paul u la ong ba kum u nongmihkhmat u kwah ban ïohi ba ka jingmut jingpyrkhat jong ki nongshong shnong kan san bad rangbah bad kin tip ba ka Ri India ka ïaid lyngba ki jingkylla kiba shyrkhei ha kiba bun ki liang, bad kumta ka long kaba donkam bha ba ki nongthep ‘vote’ kin pynthymmai ïalade bad ki jingkylla kiba ïai jia na kawei ka khyllipmat sha kawei pat.
