Imphal, ïaïong:
Ka seng kieng atiar United Kuki National Army (UKNA) ka la kam ba ka la donkti ban leh ïa ka kam thombor pyrshah ïa ki trok kit umphniang bad lyer ha ka surok NH-37 kaba la pynïasoh ïa ka Imphal-Silchar ha ka por ba la wan ka jingpynrem jur na u Myntri Rangbah jong ka Manipur bad kiba bun ki kynhun ha ka Sngi Balang.
Ha ka jingthoh ba la phah da u Defense Secretary jong ka UKNA, la kam ba ka seng ka la donkti ban siat bad thombor ïa ki kali kiba ïaid ha ka surok NH-37 bad ong ba kane ka long ka sien kaba nyngkong ban leh ïa kane ka kam thombor pyrshah ïa kine ki kali kit mar bad kiwei pat kum shi bynta ban kyrshan ïa ka jaitbynriew Meitei.
Ka UKNA ka la pynpaw ka jingsngewsih halor ka jingmynsaw jong u nongñiah jong kawei ka trok ha ka por ba ki la pynibor, ha kaba ka la maham ba ym dei ban don kino kino ki kali kit mar na Imphal ki ban ïaid ha ka surok NH-37 naduh ba la buh ka jingmaham.
Kane ka jingpyrshah jong ka kane seng ka long ban kyrshan ïa ka kynhun jaitbynriew ha kaba ïadei bad ki jingeh ba la wanrah da ka sorkar jylla ha kine ki 11 bnai ba la leit ban khmih bniah ban ym don ki kali kiba kit ïa ki mar beaiñ bad ki tiar siat ban leit thombor ïa ki jait bynriew Kuki.
Ka jingthoh ka la ong shuh shuh ba kane ka jingpyntreikam ka dang ïai bteng bad lada don kino kino ki nongkit mar kiba leh pyrshah halor kane kin sa shah ñiew ba ki dei ki nongshun jong ki Kuki bad kine ki nongleh pyrshah kin sa ngat ha ki jingpynshitom jong ki kyndon ba la buh.
Kumba la jia, la ong ba ki dkhot ka UKNA ki la siat ïa ki trok, kit umphniang bad kiwei pat, ha ka surok bah Imphal – Jiribam ha Manipur ha ka sngi Ba-ar.
Kane ka jingjia ka la jia ha ka por 10.30 mynstep jong ka sngi Ba-ar ha ki bynta jong ka NH 37, kaba don hapdeng ka Shanti Khunou bad ka Kaimai ha Tamenglong distrik, ka jaka kaba jngai kumba 160 km na Imphal, la ïathuh ki pulit.
Ki runar ki la siat ïa ki trok kit mar, kynthup ki trok kit umphniang kali bad LPG.
U nongñiah jong kawei na kine ki kali, u Tularam Magar na ka shnong Irang Part-II kaba don ha Tamenglong, u la mynsaw na ka jingdei kuli ha ka kjat bad mynta u dang don ha ka jaka ai jingsumar.
Ki pulit ki la ïathuh ba ïa u Magar la kit da ka liengsuiñ na Khongsang Helipad.
Ka sorkar Manipur ka la phah ïaid ïa kine ki kali kit mar bad umphniang nangne na ka bynta ka jingshngaiñ, hynrei ki la don tang kumba katto-katne tylli kiba pyndonkam ban ïaid na NH-37 ha ki 10 bnai ba la leit naba la jia ka jingïakynad bajur ha ka jylla.
