Shillong, Ïaïong 19
U kyrtong ka Voice of the People Party (VPP) ha kane ka ilekshon sha ka Lok Sabha, Dr. Ricky A.J. Syngkon ha ka Sngi Thohdieng u la ong ba ka jingsaphriang jong ki khubor lamler ha ki rynsan lad pathai ka long tang ban ïalam bakla ïa u paidbah bad kan ym don jingktah eiei ïa ka seng ha kane ka ilekshon.
“Sngewsih ba kin pyndonkam da ki khana kiba thok ba shukor. Kato ka dei kaei – ka jingthok, jingshukor ïa u paidbah. Ngi kum ka seng naduh ka sngi kaba nyngkong, ngi pyrshang ban leit ban pynshai bad pynsngewthuh ïa u paidbah ba u paidbah un long uba stad, uba shemphang, u ban tip ïa la ka hok bad ïa la ka bor kum u nongthep ‘vote’. Hynrei ki don pat kine kiba ïalam bakla bad kane kam dei ka sien kaba nyngkong,” la ong u Dr. Syngkon haba kren sha ki lad pathai khubor hadien ba la dep thep ïa ka ‘vote’ ha Glakyn Academy Higher Secondary School, Pohkseh.
U la ong ruh ba kine kiei-kiei baroh ki dei ki dak bad ki don kiba shu kwah tang ban shu pynbiej bad ban thok ban shukor ïa u paidbah lyngba kine ki snem ba la leit noh.
“Ka long kaei-kaei kaba sngewsih ba ha kaba kum kane ka por, phin dang kwah ban pynbiej, ban thok, shukor bad ïalam bakla ïa u paidbah. Kam long kaei-kaei kaba sngewtynnad ne itynnad,” u la ong.
U kyrtong ka VPP u la ong ruh ba kum ka seng kam don kano-kano ka jingartatien ba ki paidbah ki la sngewthuh bad shai, bad kumta kan ieh ha ka jingstad jong u paidbah.
Halor ki jingkynnoh bapher-bapher pyrshah ïa ka seng, u la ong, “Ngan ong aïu halor kane, haba phi la tip ba phi la rem lypa, ki briew ki sdang ban pynmih ïa ki jingkynnoh ba har rukom. Hynrei kam shym la don shisien ruh ba ka seng ka la don bynta ha ka politik ba tad-dor. Ka long kaei-kaei kaba sngewsih ban shu kynnoh halor kaei-kaei kaba khlem nongrim.”
Ha kawei ka liang, haba kylli halor ka jingkyrmen skhem jong u ban poi sha ka thong, u Dr. Syngkon uba dei ruh u General Secretary ka VPP, u la ong ba kum ka seng ka don ka jingkyrmen kaba khraw ha kane ka ilekshon khamtam haba ïohsngew ïa ki khubor na kylleng sawdong ba ki briew ki la leit ban ïeng laiñ naduh ka por 5 baje mynstep.
“Ka dei ka dak kaba sngewtynnad ba u paidbah u la thrang bad angnud shisha ïa kane ka sngi bad ban ïohi noh ïa ka jingkylla ha kane ka kynti,” u la ong.
Shuh shuh u la bynrap, “Nga kyrmen skhem ban poi sha ka thong ha kane ka ilekshon.”
