Shillong, Ïaïong 19
Ki paidbah ka jylla ki la mih dangstep phyrngab na la ïing ban leit thep ïa la ka ‘vote’ na ka bynta ka ilekshon MP Lok Sabha ha ka Sngi Thohdieng ka 19 tarik u Ïaïong.
Ha ka jingsakhi ïa ka jingthep ‘vote’ hapoh ka shnong Lumkshaid Lower Mawprem, ki paidbah naduh ki samla- samhoi, ki longkmie-longkpa bad tymmen-kro ki la mih na la ïing la sem naduh dangstep phyrngab ban leit ïeng ha u laiñ na ka bynta ban thep ïa la ka ‘vote’ ha ka jaka thep ‘vote’ ban pyndep ïa ka kamram bad ban pyndonkam hok ïa ka bor bad ka iktiar kaba kum ki nonshong shnong ka Ri synshar paidbah ki shah pynkhamti.
Haba ïoh ban ïakren bad katto-katne ngut ki nongshong shnong kiba la kham noh ka kyrta kiba shong ba sah hapoh kane ka shnong ki la pynpaw ba kum ki nongshong shnong ka jylla ki la thep ïa la ka ‘vote’ naduh ki por kiba mynshwa bad ki da angnud shikatdei eh ban wanrah ïa ki jingkylla hapoh ka jylla bad khamtam eh hapoh ka ri bad ka jaitbynriew baroh kawei khnang ba ka ïoh ka kot bad ka bit ka biang jong u paidbah kan long kaba biang.
“Mynta nga la kham rangbah nga la skhem ki jingmut jingpyrkhat bad nga kwah tang ki jingshisha, ngam kwah palat nangta bad nga kyrshan ruh ïa kaba shisha”, la pynpaw uwei na ki nongshong shnong.
Kitei ki nongshong shnong ki la ong ba ki seng saiñ pyrthei kiba heh hapoh ka jylla kim da kitkhlieh than ïa ka jylla namar ba ki dei ki seng saiñ pyrthei kiba heh ki kitkhia ïa ka Ri India baroh kawei.
“Ki seng riewlum ki don ka jingkitkhlieh ïa la ka jong ka bynta na ka bynta ka ri bad ka jylla, hynrei ki seng saiñ pyrthei kiba heh ka shem shitom ïa ki ba kin kitkhlieh ïa ka jylla lajong bad ka long kumta hi kumba ka paw bad ki kam ba ki trei hapoh ka jylla kim da paw than”, la ong kitei ki nongshong shnong.
Kitei ki nongshong shnong ki la ong ruh ba ha kane ka kynti kaba mynta ki da kyrmen met bad mynsiem ba ki jingkylla kiba kham phylla kin wan hapoh ka jylla. Hynrei lada ki paidbah ki bakla ban jied ïa u nongmihkhmat kan nym wanrah satia ïa kano-kano ka jingkylla. Nalor nangta, ki la ong katkum ki dak ki shin kiba la paw, la ïohi ba ki paidbah babun balang ki kwah bad angnud shikatdei eh ïa ka jingkylla ym ka jingkylla kaba sniew, hynrei ka jingkylla na kaba bha sha kaba kham bha shuh-shuh.
“Lada ki jingkylla kim wan ka mut ka Ri jong ngi ka lah kut”, la bynrap kitei ki nongshong shnong.
Shuh shuh kitei ki nongshong shnong ki la ong ruh ba kino-kino ki kyrtong ki ban ïoh kheit ïa u soh ka jingjop ki dei ban leh bad bat ïa ka kular kumba ki la khlei bad kren ha ki rynsan ïalap ilekshon khnang ba ka jingangnud jong u paidbah kan ym long kaba sepei.
“Mynta ngi kwah ba kan wan ka jingkylla kaba kham i shongdor bad kumba ngi thrang ngi kwah ba kan long katkum ka ktien jong ki kaba ki kren thik bad kaba ki ong hangtei hapoh ki rynsan ïalap paidbah ba kan long kumta hi kumba ka dei ban long kum ka ktien jong ki khnang ba ka jingangnud jong ngi kan nym long kaba sepei”, la pynpaw kitei ki nongshong shnong.
