Bengaluru, ïaïong:
Naba kiba bun ki bynta jong ka Karnataka, kynthup ka Vijayapura, Bidar bad ka Bagalkot kumba la sakhi, ki la ïoh ïa ka jinghap slap, katba ka Bengaluru kaba la bna nam ba ka long ka nongbah kaba pyngngad ka la ngat ha ka jingeh naba la slem kam pat ïohmad ïa ka jinghap jong u slap. Kane ka la long ha ka sien kaba nyngkong ha ki 62 snem ba la leit.
Katkum ka jingbuh jingkheiñ jong ka IMD, ka nongbah ka la ïohmad jingeh na ka jingslem jong ka jingwan hap jong u slap na ka bynta ki 146 sngi. Ka jinghap jong u slap uba khatduh ha Bengaluru ka la long ha ka 7 tarik, Naiwieng bad ka 8 tarik, Naiwieng kaba long da 71.2mm bad 29.3mm.
Ha ka 23 tarik, Naiwieng, ka nongbah ka la ïoh ïa ka jinghap slap kaba long tang 1.6mm ha kaba kane ka la long kaba khatduh eh ha une u bnai.
Hadien kane, ha ka 3 tarik, Nohprah bad ka 4 tarik, Nohprah, ka nongbah ka la ïoh ïa ka jinghap slap kaba 0.3mm bad 0.4mm.
“Ka jinghap jong u slap ha u Nohprah ka long ka bym myntoi ei ei namar ba kam shym la long wat tang 1 mm ruh. Kane ka la long ha ka sien kaba nyngkong ba ka la ïoh slem ïa ka jinghap slap kaba la long naduh u snem 1962. Naduh u snem 1962-2024, ki la don kumba 9 tylli ki snem ba ka nongbah kam shym la ïohmad ïa ka jinghap slap naduh u Kyllalyngkot haduh u Lber, kane ka la long ha u snem 1964, 1965, 1973, 1975, 1976, 1983, 1992, 1996 bad 2007,” la ong u Director jong ka IMD ha Bengaluru u N Puvaiarasan ha ka jingïakren bad ki nongthoh khubor.
“Hynrei naduh ka 4 tarik, Nohprah haduh ka 17 tarik, Ïaïong, 2024, kam pat ïoh slap, kane ka la long kaba la slem bha. Kiwei pat ki distrik jong ka Karnataka ki la ïohmad ïa ka jinghap jong u slap bad ka ‘erïong, hynrei kam shym la don ka jingkah dum jong u lyoh ha ka nongbah Bengaluru. Kane ka dei na ki bor jong ka lyer kiba pynlong ïa ka jingshah ktah ka suiñ bneng. Ka la long ruh na ka jinglong jingman ha ki um duriaw kiba wan rah jingkylla bad ki bym ailad ban pyllang ïa u lyoh,” la ong shuh shuh u N Puvaiarasan.
