Shillong, Ïaïong 19
U General Secretary ka UDP Sengkmie, Bah Jemino Mawthoh, u la ong ba kane ka ilekshon MP Lok Sabha kaba mynta, ka UDP kam lah shuh ban ai jingkheiñ namar ka dei ka ilekshon kaba pher bha na baroh.
Hadien ba ka jingthep ‘vote’ ka la kut ha ka por 4:00 baje janmiet ha ka Sngi Thohdieng ha baroh kawei ka jylla, ka UDP kaba ïatreilang bad ka HSPDP ha ka Regional Democratic Alliance (RDA) kam shym la ïoh jingkheiñ kaba tikna na ki 36 tylli ki konstitwensi na ka bynta u kyrtong, Bah Robertjune Kharjahrin.
Haba ïakren bad u Bah Jemino, u la ïathuh ba ka long ka rukom ba ki nongkitkam na ki jylli ne ki konstitwensi ki ju ai jingkheiñ mar shu dep thep ‘vote’, hynrei mynta kane ka ilekshon wat ki nongkitkam kim nang shuh ban ai jingkheiñ.
U la ong kumba ka UDP bad HSPDP ki la ïatreilang ha ka RDA, namar kata, u don ka jingkyrmen ba u kyrtong Bah Robertjune Kharjahrin un poi sha ka thong jong ka jingjop.
Nalor nangta, u la pynpaw ba ha kane ka ilekshon ka jingïakawang ktieh ka jur bha ha kiwei ki seng saiñ pyrthei, hynrei ka UDP ka pynkhlaiñ ïa ka nongrim lajong na ka bynta ka jaidbynriew.
Haba ïa dei bad ka jingbuh jingkylli jong kiwei ki seng saiñpyrthei halor ka jingbym mih jong ar ngut ki MLA HSPDP, u Bah Jemino u la ong ba kaei ba ka seng ka la rai ka dei kata ka bor ba ha khliehduh, hynrei ïa ka jingjah uwei ne ar ngut kan nym mih ka jingïakren.
U la ong lada jah uwei ne ar ngut kata ym lah ban khang ïa ka mon laitluid namar wat ïa u Secretary ne President ki hap ban kohnguh ïa ka rai jong ka seng baroh kawei.
