Shillong, Ïaïong 19
Ka jingpoi ki nongjied ban thep ‘vote’ ha ki ar tylli ki Lok Sabha konstitwensi ha kane ka Jylla ka long kumba 72.26 na ka 100 (percent) ha Shillong Lok Sabha konstitwensi katba ka jingpoi ki nongthep ‘vote’ ha Tura Lok Sabha konstitwensi ka long kumba 78.31%.
Kane ka jingkheiñ halor ka jingpoi ki nongthep ‘vote’ ha kane ka ilekshon MP 2024, ka pyni ba ka jingpoi ki nongthep ‘vote’ ka kham kiew ban ïa ka ilekshon MP ha u snem 2019. Katba ha Tura ka jingpoi ki nongthep ‘vote’ ka la kham hiar lada ïanujor bad ka ilekshon MP ha u snem 2019.
Ha u snem 2019 ka jingpoi ki nongthep ‘vote’ ka long kumba 65.48% ha Shillong Parliamentary konstitwensi bad ha Tura ka long 81.38%.
U Chief Electoral Officer (CEO), u Dr. B.D.R Tiwari u la kam ba ka jingpynlong ïa ka ilekshon ka long kaba ïaid beit hapdeng ka jingsuk jingsaiñ khlem kino-kino ki jingjia ki bym sngewtynnad.
U la ong ba ka jingpoi ki nongthep ‘vote’ ka lah ban nang kham kiew sa katto-katne ynda la dep ïoh jingkheiñ tikna na kylleng ki jaka thep ‘vote’.
U la ong ba ki la paidbah ki la mih ryntih ban leit thep ‘vote’ khamtam ha ka por mynstep ha kaba ki paidbah ki la don lypa ha ki jaka thep ‘vote’ bad kane ka la ai mynsiem shisha haba ïadei bad ka jingpoi ki nongthep ‘vote’ ban pyndep ïa ka kamram jong ki.
U CEO u la ïathuh ba ha ka por ba dang ïaid ka jingthep ‘vote’ ka don ruh ka jingthut ki kor thep ‘vote’ kiba kynthup 47 tylli ki Balloting Unit, 54 tylli ki Controlling Unit bad 109 tylli ki VVPAT kiba la hap ban bujli bad ka jingthep ‘vote’ ka la ïaid beit hadien ba la dep ban bujli.
Haba kylli halor ka jingkynnoh ba ki don ki jaka thep ‘vote’ kiba shu pynthep lem ïa ka ‘vote’ jong kiwei da ka jingsngewthuh lang, u CEO u la ong ba ym don kano- kano ka jingujor kum kata.
Haba kylli halor ka jingïoh shondur ki nongthep ‘vote’ ïa ka EVM kaba pyni ba ki la thep ïa u ne ka kyrtong ba ki kyrshan, u Dr. Tiwari u la ong ba hap ban bishar katkum ki kyndon jong ka aiñ bad yn ujor ejahar ïa kiba kum kita.
Ka jingthep ‘vote’ ka long shisha kaba kham shongshit namar ha bun tylli ki jaka thep ‘vote’ ki paidbah ki la don lypa naduh dang step hashwa ban sdang ka por thep ‘vote’.
Ka jingthep ‘vote’ ka la sdang ha ka por 7 baje mynstep bad kut ha ka por 4 baje janmiet.
Ki jaka thep ‘vote’ ha Shillong konstitwensi kaba kynthup ïa ki 36 tylli ki MLA konstitwensi ki don 2,288 tylli katba ha Tura konstitwensi kaba don 24 tylli ki MLA konstitwensi ki jaka thep ‘vote’ ki don 1,224 tylli. Ka jingthep ‘vote’ ka la ïaid beit hapdeng ka jingpahara jong ki pulit Central Armed Police Force (CAPF).
Da ka jingthep ïa ki ‘vote’, ka bok ka nusib jong ki kyrtong mynta ka don sa tang ha ka jingñiew ‘vote’ ka ban long ha ka 4 tarik u Jylliew 2024.
Ha Shillong parliamentary konstitwensi, ki don 6 ngut ki kyrtong kiba kynthup ïa u MP ba mynta Bah Vincent H Pala uba dei u kyrtong ka Congress, ka kyrtong ka National People’s Party (NPP) ka Kong Ampareen Lyngdoh, u kyrtong ka Voice of the People Party (VPP) Dr. Ricky A.J Syngkon, u kyrtong ka United Democratic Party (UDP) u Bah Robertjune Kharjahrin, ki kyrtong shimet u Prof Lakhon Kma bad u Bah Peter Shallam.
Ha Tura Parliamentary konstitwensi ki paidbah kin leit thep ïa ka ‘vote’ jong ki ban jied ïa ki 4 ngut ki kyrtong kiba kynthup ïa ka MP ba mynta ka Agatha K Sangma kaba dei ka kyrtong ka NPP, u kyrtong ka Congress u Saleng A Sangma, u kyrtong ka TMC u Zenith Sangma bad u kyrtong shimet u Labenn Ch Marak.
Ki nongthep ‘vote’ ha Shillong parliamentary konstitwensi ki don 14,00,411 ngut bad ha Tura konstitwensi ki don 8,26,156 ngut.
