New Delhi, ïaïong:
Ka seng Aam Aadmi Party (AAP) ha ka Sngi Palei ka la rai ïa ka kyrteng jong u Councillor ka Dev Nagar u Mahesh Kumar Khichi (45) bad u Councillor ka Aman Vihar u Ravinder Bhardwaj (35) kum ki kyrtong ka seng ban ïakhun na ka bynta ka shuki Mayor bad Deputy Mayor na ka bynta ka ilekshon Municipal Corporation of Delhi (MCD) ka ban long ha ka 26 tarik, Ïaïong.
Ka Dev Nagar Ward ka don ha Karol Bagh, katba ka Aman Vihar Ward ka don ha Kirari.
U Bhardwaj u la long u Councillor ha ka sien kaba ar bad hashwa u la long u dkhot jong ka Standing Committee.
Ïa ka Post Mayor la mang na ka bynta ki Councillor ka Scheduled Caste ha kane ka ilekshon. U Councillor jong ka seng AAP ha East Patel Nagar u Shelly Oberoi u la shahjied Mayor ha ki ar tylli ki ilekshon ba la dep ban pynlong ha u bnai Rymphang bad u Ïaïong jong u snem 2023.
Ïa ki Mayor jong ka MCD la ju jied na ka bynta shi snem ka samoi treikam.
Ha ka por ba la pynbna, u nongai buit aibor jong ka seng AAP ha Delhi u Gopal Rai u la ong ba kine ki arngut ki kyrtong kin sa ïaid shakhmat ban trei ïa ka kam ba la leh da u Oberaoi bad ki briew jong ka Delhi ki la lah ban sloit ïa ka seng Bharatiya Janata Party (BJP) na ka MCD.
“Hadien ka ilekshon Mayor ha Chandigarh, ngi la ïohi ba haduh katno ka seng BJP ka la tuh ïa ki vote. Ngi la long kiba la khreh ban ïohkem ïa ki buit jong ki,” la ong u Rai.
U nongkhmih bad nongpynïaid jong ka seng ha MCD u Durgesh Pathak u la ong ba baroh ar kata u Khichi bad u Bhardwaj ki la ïatreilang bad ka seng naduh ki por ba dang sdang.
“Ngi don ka jingkyrmen ba kin sa lah ban trei shakhmat ïa ka kam bad ban kyntiew ïa ka roi ka par kumba la leh da ki nongïalam kiba hashwa,” la ong u Pathak.
