Shillong, Ïaïong 19
U coach ka German u Julian Nagelsmann u la soi ïa ka kontrak na ka bynta ban ïai bteng ha ka ka kam haduh ka World Cup ka ban long ha u 2026, la pynbna ka German Football Association ha ka Sngi Thohdieng.
Hadien ka jingmih noh u Hansi Flick uba la shimti shipor ïa kane ka kynhun, ka kontrak jong u Nagelsmann ba dang 36 snem ka rta kan poi sha kaba kut mynta ka aïom lyiur hadien ka European Championship.
Kat kum ki khubor la ong ba utei u coach u la don ka jingthmu ban leit shimti biang ïa ka klob barim ka Bayern Munich, kumjuh ïa ka Liverpool bad kiwei pat ki klob. Pynban u Nagelsmann u la pynkut noh ïa kine ki khubor hamsaïa hadien ba u la soi ïa ka kontrak na ka bynta ban pynkut haduh ka World Cup ka ban long ha u 2026.
“Kane ka rai ka dei kaba la wan naduh ka mynsiem. Ka long ka burom kaba khraw ban shimti kum u coach ka kynhun ïalehkai ka ri bad ruh ban ïatrei lang bad ki rangïalehkai ba kynsai jong ka ri,” la pynpaw u Nagelsmann.
“Lyngba ki jinglah ban ïalehkai bha bad ruh ka jingdon ïa ki nongkyrshan ngi lah ban shimti ïa kane ka kabu ban pyni ïa ka jingkhlaiñ ha ka pyrthei hi baroh kawei. Mynta ngi donkam ban ïalehkai bha ha ka Euro bad hadien kane ngin ïaleh katba lah ban ïalehkai bha sa ha ka World Cup.”
Lah ban kdew hangne ba ka jingrai ban ïai pynskhem ïa u Nagelsmann kum u coach kane ka kynhun ka dei lyngba ka jingïarai lang sa baroh ki dkhot ka synjuk ïalehkai jong ka German Football Association ha ka jingïalang kaba la long ha ka Sngi Thohdieng.
