Bhubaneswar, ïaïong:
Ki pulit jong ka Odisha ki la pynlong da ka jingpyntreikam ban khanglad ïa ka jingrung kyrthep jong ki bar jylla ha ki thaiñ khappud jong ka Chhattisgarh ha ka Sngi Balang hadien ba ki la don kumba 29 ngut ki Naxals kiba la shah pynïap ha ka jylla ba marjan ha Kanker distrik.
Ka tyllong khubor ka la ïathuh ba ki pulit ki la pynkhlaiñ bha ïa ka jingpahara ha Malkangiri, Koraput, Nabarangpur, Nuapada bad Bargarh distrik kiba sam ïa ka bynta khappud bad ka jylla Chhattisgarh.
“Ka jingleit pahara ha kine ki thaiñ ka la khlaiñ bha ha ki distrik kiba don ha ki bynta khappud khnang ban pyntikna ba ki lehnoh Naxal kin ym ïohlad ban rung beaiñ shah Odisha na Chhattisgarh,” la ong u heh pulit.
Ka tyllong khubor ka la ïathuh ba ki heh pulit ki la suba ba ki lehnoh kiba la don ha ka por ba la don ka jingïasiat kaba markylliang bad ki shipai ïada ri ha Chhattisgarh ne ki lah ban dei kiba la mynsaw ki lah ban rung tuh sha Odisha khnang ban lait na ki kti jong ka aiñ.
Ki pulit ki dang ïai wad jingtip na ki kynhun wadbniah bad ki shipai ki la pynkhlaiñ ïa ka jingpahara ha baroh kawei ka bynta khappud jong ka Chhattisgarh.
Shuh shuh ka tyllong khubor ka la ïathuh ba ki shipai ka Special Operation Group (SOG) jong ki pulit ka Odisha bad ki shipai ka tnat Border Security Force (BSF) bad Central Reserve Police Force (CRPF) ki la don bynta ban pahara khnang ban pyntikna ha ka ban lah khanglad ïa ka jing-rung tuh ki lehnoh ne ki bar ri khamtam ha kane ka por ilekshon.
U DGP Arun Kumar Sarangi, u Director of Intelligence u SK Priyadarsi, ADG Law and Order Sanjay Kumar bad kiwei pat ki heh pulit ki la pynlong ïa ka jingïalang bakyrkieh ha Malkangiri distrik dang shen ban khmih bniah halor ki jing-ktah jong ki kam pyntriem jong ki lehnoh Naxal ha kane ka por ilekshon khnang ban lait na kino kino ki jingeh.
