Nongpoh, Ïaïong 19
Hadien ba la kut noh ka jingthep ‘vote’ ha ka Sngi Thohdieng, u Deputy Commissioner ka Ri Bhoi District, u Arpit Upadhyaya, haba kren sha ki lad pathai khubor ha ka shlem treikam ka jong u, u la pynpaw ïa ka jingsngewkmen halor ka jingïaid beit ïaid ryntih ka jingthep ‘vote’ na ka bynta ka ilekshon MP ha baroh san tylli ki konstitwensi ha Ri-Bhoi ba kynthup ïa ka Jirang, Mawhati, Nongpoh, Umroi bad Umsning.
U Deputy Commissioner u la pyntip ruh ba kat haduh ka 4 baje janmiet, ka jingpoi jong ki nongthep ‘vote’ ha baroh san tylli ki konstitwensi ka Ri-Bhoi ka long kumba 64% bad kumba long mynta jan baroh ki kynhun kiba leit sha ki ‘Polling Station’ bapher bapher ki la poi lut lait noh satang katto-katne ki bym pat poi bad kiba don ha ki jaka ki bym biang ka ‘Mobile Network’. U la pynpaw ïa ka jingkyrmen ba ka jingpoi ki nongthep ‘vote’ ka lah ban dang kiew sha ka 68-70%.
Utei u heh ophisar ka Ri Bhoi u la pynpaw ruh ïa ka jingsngewkmen ba wat ha ki thaiñ khappud jong ka Block-II ruh ka jingpoi jong ki nongthep ‘vote’ ka la nang kiew mynta ka kynti ha kaba ki la ïoh ban pyndonkam ïa la ka hok ban jied ïa ki nongmihkhmat khlem kano-kano ka jingpynthut.
Shuh shuh, u la pyntip ruh ba ka la don kawei ka jingjia ka Umsning, ha kaba uwei u briew uba la shoh khawiang, u la thmu ban pynwit ïa ka jingthep ‘vote’ bad na ka liang u majistor ba dei khmih ha ryngkat ka kynhun Static Surveillance Team (SST) bad pulit ki la kem bad rah noh ïa u sha Umsning CHC ban phah peit bniah bad ruh ban leh ïa kaba donkam katkum ki kyndon aiñ.
