Shillong, Ïaïong 19
Lai ngut ki nongjop ha ka Beijing Half Marathon kaba la long ka sngi U Blei, ki la shah knieh noh ïa ki takma ha ki bor pynïaid hadien ba la pynlong ka jingtohkit na ka daw ka jingshah kynnoh ba ki la pynjop jubor ïa u nongmareh na China, u He Jie. Ha katei ka jingïakob, u He u la wan ha ka kyrdan ba nyngkong na ka bynta ban khur ïa ka jingjop hadien ba ki ar ngut ki nongmareh na Kenya kata u Robert Keter bad u Willy Mna-ngat lem bad u Dejene Hailu uba na Ethiopia, ki la ailad ïa utei u nongmareh na China ban long kum u lahduh. Kat kum ka dur-khih kaba la saphriang kylleng ha social media, ka la pynpaw ba ki lai ngut ki nongmareh na Africa ki la ailad ïa u He Jie ban tam shakhmat bad long kum u lahduh ha ka Beijing Half Marathon. Dei halor na kane ka daw ba ki bor pynïaid ki la pynlong ka jingtohkit. “Mynta ka sngi ki bor pynïaid ka Organising Committee ka Beijing Half Marathon 2024 ki la shim ïa ka rai ban pynlong ka jingtohkit halor katei ka jingmih ki kynrum- kynram ha ka jingïakob mareh jong ki shynrang,” la pynpaw kat kum ka kyrwoh ha ka Sngi Thohdieng. Kat kum ka dur-khih la paw ba saw ngut ki nongmareh ki la ïaryngkat mar kumjuh ha ka rukom mareh ha ka jingjngai kaba 13 miles (21 kilometre) ha ka suroh bah jong ka nongbah China. Hynrei u He, uba la khur ïa ka takma ksiar ha ka marathon jong ka Asian Games 2023, u la ïoh jingjop da shi sekhon wat la u suki noh shwa ba un pyndep ïa kane ka jingïakob mareh. Phewse ka la don ka jingkynnoh ba ka jingailad kitei ki nongmareh na Africa ka la pynlong ïa u He ban long kum u lahduh. La ong ba kitei baroh kiba wan ha ka thup kaba saw, ki la shah pynduh noh. Ha katei ka dur-khih jong ka jingïakob mareh kaba la long ha ka Sngi U Blei ka pyni ba ki nongmareh kiba na Kenya kata u Robert Keter bad u Willy Mnangat, u Dejene Hailu na Ethiopia bad u He na China ki la don ha ka thong ban ïaknieh ïa ka jingjop.
Kumta ban kynjoh sha ka thong, kitei lai ngut nongmareh na Africa ki la don ha u laiñ ban kynjoh sha ka thong jong ka jingjop, katba u He u la wan kham hadien namar u la sdang suki ha shwa ban pyndep ïa ka thong.
Dangshem mynta ka taïew na ka liang ka Chinese Athletics Asso-ciation ka la ong ba ki la pynlong ka jingïalang bad ki la pynmih ïa ka kyrwoh na ka bynta ban pynlong ka jingtohkit halor ka katei ka jingshah kynnoh.
Kum kine ki jingjia ki la jia teng ha ka Half Marathon kaba la long ha snem 2018 ha ka nongbah Shenzhen, ha kaba la lap haduh 258 ngut ki nongmareh ki la shah kynnoh don kti ban leh thoh bad shukor, kynthup ïa ka jingmareh na ki lynti kiba lyngkot (shortcuts). Ïa kine la lap lyngba ki ‘traffic camera’ kiba la buh ha ki jaka jong kane ka jingïakob.
