Shillong, Ïaïong 19:
Ka jingmih ki khubor lyngba ki lad pathai khubor ha ka 28 tarik u Lber 2024 ba ka Dorbar Shnong Mawlai Syllaikariah kan ‘boycott’ lane kan nym ïashimbynta ha ka jingthep vote na ka bynta ka ilekshon Lok Sabha namar ka jingïeh beiñ ban maramot bad ka jingbym pynbha ïa ka surok hapoh katei ka shnong da ki bor kiba dei khmih kaba la buh jingeh shikatdei eh ïa ki paidbah nongshong shnong hynrei tang hadien 2 sngi kata ha ka 30 tarik u bnai Lber 2024, ki bor ba dei khmih ki la shimkhia mardor ban wan pynbha bad maramot ïa katei ka surok hapoh ka shnong.
Kum ban shu kdew hangne, na ka liang ka Dorbar Mawlai Syllaikariah ha ka 28 tarik u Lber 2024 ka la rai ban ‘boycott’ lane ba kan nym ïashimbynta ha ka ban thep ‘vote’ ha kane ka ilekshon MP sha ka Lok Sabha kaba la long ha ka 19 tarik u bnai Ïaiong 2024 na ka daw ka jingshah lehbeiñ bad ka jingbym sngap ïa ki jingkyrpad jong ka shnong na ka por sha ka por ban maramot ïa ki surok shnong bad ki lynti shnong, kiba ka tnad PHE ka la pynjot bad shu ieh khongreng hadien ka jingwan tih ban thep ïa ki pipe um mynta la jan 2 snem eiei.
Haba ïoh ban ïakren bad u Bah A Kharkongor uba dei u Assistant Rangbah Shnong ha ryngkat ka jingïadonlang bad u Bah SB Kharpuri uba dei u Secretary ka Mawlai Syllaikariah, ki la ong ba wat la na ka liang ka Dorbar Shnong ha ka 28 tarik u bnai Lber 2024 ka la rai ba kan ‘boycott’ ïa kane ka ilekshon MP hapoh ka shnong. Hynrei na ka liang ka shnong ka la weng noh ïa kane ka jingpynsangeh ban thep ‘vote’ namar ki bor kiba dei khmih ki la phah ïa ki kontraktor ban pyntrei bad maramot noh ïa katei ka surok ha ka 30 tarik u bnai Lber 2024 hadien arsngi ka jingmih ka khubor ha ki lad pathai khubor ba ka shnong Mawlai Syllaikariah kan nym ïashimbynta ha ka jingthep vote ha ka ilekshon MP.
“Ka jingweng noh jong ngi ïa ka jingsangeh ban leit thep ïa ka vote na ka bynta ka MP ilekshon ka long hadien ka jingïohi jong ngi ïa ka kam ka jam ba ka la ïaid beit bad ba u kontraktor ruh u la wan ban pyntrei noh hi mardor ha ka 30 tarik u bnai Lber”, la ong Bah Kharkongor.
Shuh shuh na ka liang utei u Assistant Rangbah Shnong u la ong ba na ka liang ka Dorbar Shnong ka la rai ban pynsangeh ïa katei ka jingbym leit thep vote ha ka 17 tarik u bnai Ïaiong 2024 kata 2 sngi hashwa ka jingthep vote hadien ba la ïohi ba ka kam ban maramot ïa katei ka surok ka la dep.
“Ngi lah weng noh ïa kato ka jingsangeh ban thep vote bad ngi la kyrpad ïa ki nongshong shnong ba kin mih ryntih ha ka ban ïashimbynta ha ka ban leit jied ïa u nongmihkhmat kaba long katkum ka hok jong ki ba ki dei ban pyndep”, la ong u Bah Kharkongor.
Na ka liang kitei ki nongkitkam ka Dorbar Shnong ki la pynpaw ka jingaikhublei ruh ïa ki lad pathai khubor kiba la pynsaphriang ïa kane ka jingeh jong ka shnong namar ba dei lyngba jong ki lad pathai khubor ba ki bor kiba dei khmih ki la shimkhia mardor ban wan maramot bad ban pynbha ïa katei ka shnong jong ka shnong kaba la jot bad pei.
