Shillong, Ïaïong 19
Ka kyrtong ka National People’s Party (NPP) sha ka ilekshon Lok Sabha na Shillong Parliamentary konstitwensi, Dr. M. Amapreen Lyngdoh ka la ong ba ka jinglong-jingman jong ki ilekshon hapoh ka Jylla ka dap tang da ka jingkhluit bad ka jingbym burom shuh iwei-ïa-iwei namar jong kawei ka seng saiñ pyrthei.
“Ki ilekshon ha ka Jylla ki la dap da ka jingkhluit. Ngan ong ba ki don ki nongïalekai ha ka saiñ pyrthei kiba la kylla long jaboh, sniew – ka jingbym burom iwei-ïa-iwei bad dei kane kawei ka seng kaba la ieh ïa ka jingkthang ha ka jingmut-jingpyrkhat jong baroh,” la ong ka Dr. Lyngdoh haba kren sha ki lad pathai khubor ha ka Sngi Thohdieng.
Ka la ong, “Namarkata, nga ju kren shaphang ka bamsap jong ka jingmut-jingpyrkhat…la leit kito ki sngi ba ka Jylla ka burom ïa baroh ki seng saiñ pyrthei.”
Ka la ong ruh ba ka Jylla ka la don ha kata ka kyrdan ba ka don kawei ka seng kaba pynkhuit bad ñiom naphang ïa ka jingsngew jong baroh.
“Ngan ïaleh katba lah ban pyntikna ba ngin rat dyngkhong ïa kane ka politik jong ka jingsniew kaba ngi ïohi ba ka wan jia – ka jingïakawang ktieh iwei-ïa-iwei, ban pynlong ïa ki briew ban kren ba kin babe hadien. Kane ka dei kaei-kaei kaba ka Jylla kam pat ju ïohi. Kane ka jaboh kaba ki la wankit lang hapoh ka jinglong-jingman ka saiñ pyrthei hapoh ka Jylla ka long ka bym lah pdiang,” la ong katei ka kyrtong.
Ka la ong ruh ba wat la ka la don bynta ha ka saiñ pyrthei naduh ba ka dang khynnah ka rta, hynrei kam pat ju ïohi ïa kane ka jingisih kaba ima bad kaba lah ban ïalam ruh sha ka jingjot.
Ha kawei ka liang, ka la ong ba kam sngew ba ki paidbah ki kren pyrshah ïa ka Sorkar hynrei ki la pdiang sngewbha ïa ka (la ki dei ne bym dei kiba ‘vote’ ïa ka) da ka jingburom, jingieid bad ka jingkhmih lynti ha ka jingïaid lynti jong ka ha baroh 36 tylli ki konstitwensi.
“Nga sngew ba dei kane kaba ai bor ïa nga ban bteng ïa ka jingïaid lynti jong nga,” ka la ong.
Haba kdew ba kane ka dei ka sien banyngkong kaba ka ïakhun ïa ka ilekshon MP, ka Dr. Lyngdoh ka la ong, “Ngan ym ong ba nga kyrmen skhem, ngan ong ba ka kynhun bad ka seng jong nga ki la trei bha ha kane ka sien. Baroh ki nongtrei ki la mih madan bad man la ki dkhot jong ka seng ki ïadon bynta ha ka ban pan jingkyrshan.”
Shuh shuh ka la bynrap, “Lada phi kylli ïa nga la kata kan wanrah ïa ka jingmanbha…nga ngeit kan wanrah ïa kata, namar baroh ha madan ki ïakhun shitrhem ïa ka politik jong ka jingisih kaba la mih ha Jylla tang ha kane kawei ka ilekshon MP.”
