Shillong, Ïaïong 19
U MLA ka Trinamool Congress (TMC), Bah Charles Pyngrope u la ong ba u/ka kyrtong kiba jop ha kane ka ilekshon sha ka Lok Sabha ki dei ban trei hok na bynta ka Jylla bad pyndep ïa ki kular ba la khlei sha u paidbah.
“Mynta ngin hap ap ïa kaei kaba u paidbah u la rai bad mano-mano kiba shah jied, ki dei ban trei hok na bynta ka Jylla ha ryngkat ka jinglong
hok bad ki nongrim ba skhem lem bad ka jingpyndep hok ïa ki kular ba la khlei,” la ong u Bah Pyngrope haba kren sha ki lad pathai khubor hadien ba la dep thep ïa ka ‘vote’ ha ka Sngi Thohdieng ha Glakyn Academy Higher Secon-dary School, Pohkseh.
“Bunsien hashuwa ka ilekshon, ngi ju buh shibun ki jingkular bad hadien ka ilekshon teng-teng ïa kine ki kular ym ju bat, ha kawei ka liang ka long kaba sngewsih. Haba ki paidbah ki la jied ïa phi, ka mut ba ki don ka jingkyrmen bad jingangnud ba phin leh eiei, ïa kaba yn hap ban pynurlong da kita kiba shah jied ha ka jinglah kaba biang eh jong ki,” u la ong.
Na ka liang une u nongmihkhmat u la ong ba kane ka dei ban long ka mat kaba hakhmat eh jong kiba shah jied ha kane ka kynti ba mynta.
“Ka jingkular kaba la khlei ha ryngkat ka jingleh hok ka dei ban long kaba hakhmat eh ha ka jingmut jong ki,” u la ong.
Haba kylli halor ka jingkyrmen jong u ïa la ka seng (TMC) ha Ri-Lum Garo, u la ong, “Ngam da don jingtip than eh hynrei ka jingïakhun kan long hapdeng ki 3 seng bad ha kaba kut ka long kaba eh ban ong eiei, ngam lah ban batai lypa.”
Shuh shuh u la bynrap, “Kum u President ka seng, ngan kwah hi ïa la u kyrtong ban jop bad baroh ki la leh la ka jong ka bynta bad ngi kyrmen ban poi sha ka thong.”
Haba phai sha Tura Parliamentary konstitwensi ki don 4 ngut kiba ïa aireng ha kane ka ilekshon ban wan sha ka Lok Sabha ba kynthup ïa ka MP ka NPP, ka Agatha Sangma, u Saleng Sangma na ka Congress, u Zenith Sangma jong ka TMC nalor uwei u kyrtong shimet.
