Shillong, Ïaïong 19
Ka Atalanta ka la lah ban jam sha ka semi final ha ka lympung ïalehkai Europa League wat la ka la mad ïa ka jingshah rem da 1-0 kol ha ka Liverpool. Kane ka wan ruh lyngba ka jinglah ban tam da 3-1 ha ka aggregate.
Kane ka jingjop ka la pynlong ïa ka Atalanta ban nang jam bad kynjoh sha ka final ha kane ka lympung.
Ha ka wat kaba nyngkong jong ka jingïakhun quarter final, ka Atalanta ka la lah ban pynliem ïa ka Liverpool da 3-0 kol ha Anfield. Kane ka long ka jingkhang ïa ka Liverpool hapoh ka jingïalam u Juergen Klopp.
Na ka liang u Klopp u la ai jingïaroh ïa ka jingïalehkai bha ka kynhun wat la ka la mad ïa ka jingshah rem.
Wat la u la pynpaw ruh ïa ka jingdiaw mynsiem halor ka jingkut noh ka jingïaid lynti ha ka lympung ïalehkai ha Europe, bad mynta ka kynhun kan pynleit jingmut na ka bynta ka Premier League.
“Ngi la ïakynduh jingeh ha ka wat kaba nyngkong, hynrei nga itynnad ïa ka mynsiem ïakhun, ka jingthrang bad ka jingtrei shitom jong ki rangïalehkai,” la bynrap u Klopp.
“Ha ka jingshisha ngi la dei ban leit sha Dublin na ka bynta ka jingïakhun final, hynrei kane kam shym la urlong ïa ngi.”
Ïa katei ka shi kol ka Liverpool la ïoh ban thep tang mar sdang ka jingïakhun lyngba ka penalty da u khlur ïalehkai na Egypt u Mohammed Salah ha ka minit kaba 7. Kumta ka Atalanta hapoh ka jingïalam u Gian Piero Gasperini kan hap ban pynkhreh ban ïakhun semi final pyrshah Olympique de Marseille kaba la jop ïa ka Benfica da 1-0 kol na ka bynta ban tam da 4-2 ha ka aggregate.
Na ka liang u Gasperini u la pynpaw ba ka jingïakhun jong wat kaba ar ka long kaba kham kongsan ban khur ïa ka jingjop wat hapdeng ki jingeh kiba ka la ïakynduh ha kane ka jingïaid lynti.
“Lada ym lah ban khur ïa ka jingjop khlem ki jingeh, kan ym don ka burom ban kynjoh sha ka thong,” la ong u Gasperini.
Kumba ka long mynta ka Liverpool, ka la ïaryngkat mar 71 point bad ka Arsenal bad ka la nang jam ha ka jingïaknieh bad ka Manchester City kaba don ha ka kyrdan ba hakhlieh.
Ha kawei pat ka jingïakhun ka Roma ka la lah ban pynliem noh ïa ka AC Milan da 2-1 kol na ka bynta ban tam da 3-1 ha ka aggregate, katba ka Bayer Leverkusen ka la lah ban pynthikna ban jam sha ka semi final hadien ba ka la ïakhaid mad 1-1 kol pyrshah ïa ka West Ham na ka bynta ban tam da 3-1 ha ka aggregate.
Kumta ka Roma kan pynkhreh ban ïakynduh ïa ka semi final jong ka wat nyngkong pyrshah ïa ka Bayer Leverkusen ha ka 3 tarik u Jymmang.
