Shillong, Ïaïong 21
U General Secretary ka Seng Khihlang, u Bah Mario Biam u la kyntu ïa ki tnad seng jong ka Seng Khasi bad Seiñ Raij ban long kiba ïatylli ha ka thoh ka tar ban suk ki khun ki ksiew ha ka pateng ban wan haba ki dang bat ïa ka niam tynrai.
Haba wanrah ïa ka kaiphot kaba shisien shisnem ha ka Lympung Seng Khihlang kaba Laiphew Saw kaba la long ha Seiñ Raij Wahïajer, West Jaiñtia Hills District naduh ka 19 tarik haduh ka 21 tarik Ïaïong 2024, u Bah Mario u la ong ba ha ka thoh ka tar haduh mynta ki dang ïa sakma namar ki dang ïasah ha la ki jong ki ktien.
Kumta u la ong ba ka seng ka la rai ban buh noh kawei ka kyntien ba ïatylli lang ha ka thoh ban pynskhem ïa ki khun ki kti haba bat ïa ka niam tynrai, hynrei kat bym pat ïa sngewthuh lang ki lah ban ïaid la jong ka mon.
“Lada ngim pat don ka jingïatylli ngin sah beit ha la ki jong ki kyntoit” la ban jur u Bah Mario.
Halor kane ka jingeh, u la pyntip ba ka Seng Khihlang ka hap ban pynshitom ban rung ban pynsngewthuh lang.
Katba u Bah HR Kurbah uba dei u President ka Seng Khihlang, u la pynkynmaw ïa ka Hima Sutnga kaba mih na ka ‘Li Dohkha’ bad ka Hima Shillong kaba mih na ka ‘Pah Syntiew’ khamtam eh ïa ka Hima Madur Maskut kaba dei ka Hima kaba khlaiñ bor namar ka ïar haduh wah Brahmaputra bad Surma.
Ha kane ka sngi pynkut la sdang da ka jingnguh Blei na u Bah Pran Jala uba dei u President Riewtymmen Riewsan ka Seng Bah ki Nongshat Nongkheiñ ka Bri U Hynñiewtrep Hynñiewskum, ka jingrwai pdiang da ka Seiñ Raij Wahïajer, ka jingkren pdiang burom na u Bah Sniawbhalang Dhar uba dei u nongaibuit na ka Seiñ Raij Wahïajer ryngkat ka jingpyni ïa ki jingshad bad rwai tynrai na ki khun samla jong ki tnad Seng Khasi bad Seiñ Raij bapher-bapher.
Ha kane ka lympung la ïohi ïa ka jingwanlang ki nongmihkhmat naduh u Bah Sniawbhalang Dhar uba dei u MLA ka Nartiang konsitwensi bad Symbud Myntri Rangbah ka jylla uba bat ruh ïa ka kam kum u nongaibuit ka Seiñ Raij Wahïajer, u MLA ka Jowai Bah Wailadmiki Shylla, Bah Damanbait Lamare MLA ka Umroi, Bah Matthew Beyondstar Kurbah MLA na Mawphlang bad kiwei kiwei ‘riew rangbah.
