Shillong, Ïaïong 21
Ka Hynñiewtrep Youth Council (HYC) Sports Cell Central Executive Committee ha ka Sngi Saitjaiñ ka la ïoh ban plie pyrda ïa ka lympung ïalehkai phutbol ba la tip kum ka 1st Hynñiew-trep U-16 Football League ba la pynlong ha Madan Malki.
Ïa kane ka lympung la plie pyrda da u Vice President ka Seng u Samla Donboklang Kharlyngdoh ha ryngkat ka jingïadonlang ki dkhot ka Dorbar Shnong Malki lem bad kiwei kiwei kiba ka seng ka la khot sngewbha.
Ka jingpynlong jong ka HYC ïa kane ka lympung ïalehkai ka long ruh kum shi bynta ban rakhe ïa u mawmer jong ka jingdap 10 snem ha ka jingïaid lynti jong ka seng. Ïa ka jingïalang ha kane ka sngi la pynïaid da u Chairman jong ka Sports Cell ka HYC u Samla Franky Kharumnuid.
Ha kane ka sngi sdang ïa kane ka lympung, la don haduh saw tylli ki jingïalehkai. Ha ka jingïalehkai kaba nyngkong ka PFR ka la lah ban pynliem noh ïa ka Albinus Sports Club da 2-0 kol. Ka Lamjingshai Sports Club ka la pynliem noh ïa ka Tur Shaphrang Sports Club da 6-0 kol.
Ha kiwei pat ki jingïalehkai, ka Nangiaikiew Sports Club ka la pynliem noh ïa ka Little Kickers da 1-0 kol bad ka jingïalehkai ba khatduh jong kane ka sngi ka la kut noh ha ka jingïakhaid hapdeng ka Little Star Academy pyrshah ïa ka Merinda Sports Club ha kaba ym shym la don kiba la ïoh ban pynkhih jar.
Ki jingïalehkai ban wan jong kane ka lympung kan long biang ha ka 24 tarik mynta u bnai ha ka por 10 baje mynstep ha kaba ka Ebony Eagles kan ïakhun pyrshah ïa ka Tanmaw Football Club, ha ka por 11.30 mynstep ka PFR Ri-Bhoi Centre pyrshah ïa ka Warrior Football Club, ha ka por 1 baje mynsngi ka PFR Reserved Team pyrshah ïa ka All Star Academy bad ha ka por 2.30 nohphai sngi ka Umphyrnai CC pyrshah ïa ka Lyntijam Football Academy.
