Shillong, Ïaïong 21
Kum shi bynta jong ka jingrakhe ïa ka ‘World Heritage Day’, ka Meghalaya Basin Management Agency (MBMA), ha ryngkat ka jingïasnoh kti lang bad ka Syrwet U Barim bad ka North East Zone ICOMOS India, ka la pynlong ïa ka ‘Mariang Festival’ ha ka shnong Pyrnai, Pynursla Block, East Khasi Hills distrik.
Kane ka tamasa ka la khring ïa ki nongwan jngoh kai bad ki nongshong shnong ban rakhe ïa ka jingriewspah ka Jylla ha ka liang ka lariti bad ki tiar ba kordor u mynbarim. Ha kajuh ka por, ha kane ka tamasa la wan ïashim bynta lang ruh da ki nongmihkhmat ka ICOMOS India, North East Zone.
Ki nongïashim bynta ki la ïoh ban ïashim bynta lang ha ka ‘Heritage Walk’, da kaba ngam jylliew sha ki tynrai jingïadei hapdeng u briew bad ki jingitynnad mariang ha ka rukom jong ki jingkieng jri ne ki ‘Living Root Bridge’.
Kine ki jingkieng ki ïeng kum ki sakhi haba phai sha ka jingïa im lang ba ïajan jong u briew bad ka mei mariang, da kaba kynthup lang ïa ki riti-dustur kiba da ki spah snem bad ka jingshemphang.
Baroh shi sngi, ki nongïashim bynta ki la byrngia ïa ki jingrwai bad jingshad tynrai, kiba pyni ïa ka jingriewspah jong ka lariti ka Jylla.
Ha kajuh ka por, ki jingpyninam ïa ki jingshna bad ki riam tynrai ki long ka nuksa bad pyni ïa ka jingtbit jong ki nongshna jingshna bad ‘riewdon sap jong ka thaiñ, katba ki ‘riew ieid bam ki la ïoh ban mad ïa ki jingbam tynrai bapher-bapher.
Nalor kine ki jingpyninam ïa ka lariti, katei ka tamasa ka la kynthup ruh ïa ki jingïalehkai tynrai kum ka ‘Sum Khnam’, ‘Maw Poiñ’, bad ‘Tan Lang Nob’, ha kawei ka liang kaba la nang pynshongshit shuh-shuh ïa ka tamasa.
Ka phang jong ka ‘World Heritage Day’ mynta u snem ka long ‘Disasters & Conflicts through the Lens of the Venice Charter’, bad ka kdew ïa ka mon ba jwat jong ka Jylla ban ïaishah ïa ki jingtynjuh bapher-bapher.
