Shillong, Ïaïong 21
Kumba ju long ha ki ilekshon kiba la leit, ka jingpoi ki nongthep ‘vote’ ha ki konstitwensi ha sor ki kham duna bha lada ïanujor bad ki konstitwensi ha thaiñ nong-kyndong.
Ha kane ka ilekshon Lok Sabha na Shillong parliamentary konstitwensi, la sakhi ba ha ki katto katne ki MLA konstitwensi ha sor Shillong, ka jingpoi ki nongthep ‘vote’ ka kham duna lada ïanujor bad ki MLA konstitwensi ha nongkyndong bad ha khapsor.
Ha East Shillong konstitwensi kaba dei ruh ka konstitwensi jong ka kyrtong ka NPP ka Kong Ampareen Lyngdoh, ka jingpoi ki nongthep ka long tang 60.82 na ka 100. Ha West Shillong kiba poi leit thep ‘vote’ ki long 62.41 na ka 100.
Ha North Shillong konstitwensi, kiba leit thep ‘vote’ ki long 59.55 na ka 100, katba ha South Shillong konstitwensi kiba leit thep ‘vote’ ki long tang 58.36 na ka 100, bad ka dei ruh ka konstitwensi kaba duna tam eh kiba leit thep ‘vote’.
Ha Nongthymmai konstitwensi, kiba poi leit thep ‘vote’ ki duna bha, kata, tang 63.31 na ka 100.
Ha kiwei pat ki konstiwensi, ki paidbah ki poi lei thep ‘vote’ palat ïa ka 70 na ka 100 bad ki don ki konstitwensi kiba poi haduh 80 na ka 100 ne kham palat shuh shuh.
Ha Tura Parliamentary konstitwensi, ki MLA konstitwensi kiba bun tylli ki dei kiba ki nongthep ‘vote’ ki mih bha ban leit thep ‘vote’.
Hynrei ka MLA konstitwensi kaba duna tam eh ki paidbah ban leit thep ka dei ka South Tura konstitwensi kaba dei ruh ka konstitwensi jong u Myntri Rangbah ka Jylla.
Ha South Tura konstitwensi, kiba poi thep ‘vote’ ki long tang 69.60 na ka 100 bad ha North Tura konstitwensi kiba poi thep ‘vote’ ki long 73.08 na ka 100.
Kiba bun ki MLA konstitwensi ki sakhi ba ka jingpoi ki nongthep ‘vote’ ka long beit palat 80 na ka 100 ha Tura Parliamentary konstitwensi.
