Kyiv, ïaïong:
Ha ka sien ba nyngkong naduh ba khie ka thma hapdeng ka Russia bad ka Ukraine ha kine ar snem mynta, ka Ukraine ha ka Sngi Saitjaiñ ka la iathuh ba ki shipai ka Ukraine ki la ioh siat pynbthei ia kawei ka liengsuiñ ïapom ba khlaiñ tam jong ka Russia bad kaba ju ther bom ia ki bynta bapher bapher jong ka Ukraine namar ka jingkhlaiñ jong ka ban pynpoi jngai ne ban pynher jngai ia ki ‘namding kiba mih na ka.
Katei ka liengsuiñ ïapom ba khlaiñ bor jong ka Russia ka dei kaba la ju tip kum ka ‘Tu-22M3 Long-range Strategic Bomber’.
Kumta na liang ka tnat iada ri jong ka Ukraine ha katei ka sngi ka la iathuh ba ki shipai ka Ukraine ki la ioh ban tehlakam noh ia katei ka liengsuiñ ïapom kaba khlaiñ bor bha bad kaba ju wanrah jingma ia ka Ukraine na ka por sha ka por namar ki bom ba khlaiñ bor jong ka.
Ha kajuh ka por la ong ba ki shipai ka Ukraine ki la ioh siat pynbthei ruh ia kumba 29 tylli ki drone ba la leit poi na Russia, 2 tylli ki Kh-101/Kh-555 Cruise Missile, 14 tylli ki Shahed UAV bad kiwei de ki ‘namding kiba la siat bad pynher da ka Russia ban ioh pynjulor ia ki shlem treikam jong ka Ukraine ha katei ka miet.
Shuh shuh ruh la ong ba ka Ukraine ha kane ka por ka dang iai ap khmih lynti ia ki tiar iakhun thma kiba khlaiñ bor na ki ri ba marjan kiba ju ai jingkyrshan ia ka na ka por sha ka por naduh ba sdang ka jingleit hiar thma jong ka Russia ia ka Ukraine.
Wat la katta, ka Ukraine ka la pynpaw ka jingsngewkhia kaba jur namar ki ri ba marjan jong ka kim shym lah shuh ban ai ka jingkyrshan kaba pura bad kaba kloi kumba ki la leh naduh kaba sdang haba ki iohi ia ki kam thombor jong ka Russia kiba la buh jingma ia ki paidbah nongshong shnong ka Ukraine ha kane ka por.
