Tura, Ïaïong 21
Namar ka jingshah pynïap dusmon jong 3 ngut ki nongshong shnong ka Assam hajan ka shnong Tamsura, East Garo Hills (EGH), ka All Assam Minority Students’ Union (AAMSU) – Goalpara ka la ïakynduh bad ki kynhun seng bapher-bapher ka North Garo Hills (NGH) lem bad ka tnad treikam ka GSU-Assam ban wad ka lad ka lynti ban lait na ka jingïakynad naduh ba jia katei ka jingjia.
Ïa katei ka jingïakynduh la pynlong ha ka Sngi U Blei ha Dudhnoi IB, Goalpara distrik, Assam.
Dang ha ka taïew ba la dep, 3 ngut ki nong Assam kiba la leit sha EGH na bynta ka kam, la lap ba ki la shah pynïap bad ka kali kaba kitei ki 3 ngut ki shong ka la shah thang noh. Kumba ka paw shai, kitei ki 3 ngut ki la shah thang im bad hadien kata la tep noh ïa ki ha kawei ka thliew.
Ïa ki metïap jong kitei ki 3 ngut la lap hadien da ki pulit bad la pynngat mukotduma pynïap briew haba ïadei bad katei ka jingjia. Kumba ka long, ym pat pynithuh ïano-ïano ruh haduh mynta katkum ka kaiphod ba dang shen na ka tnad pulit ka Jylla.
Ka jinglong-jingman ka bym itynnad ka la sdang ha Assam halor katei ka jingshah pynïap ha baroh arliang khappud ha ryngkat ka jingïarap jong ki rynsan lad pathai ban nang ai ding shuh-shuh halor katei ka jingjia.
Hynnin ka sngi, ki nongshong shnong ka Assam ki la khang ïa ka surok kaba wan sha Meghalaya, ha kawei ka liang, kaba la ïalam sha ka jingkulmar jingmut. Ha kajuh ka por, la pynlong ruh ïa kiba bun ki jingïakynduh lang ban dawa pynsted ïa ka jingtohkit bad ban pynïoh ïa ka hok na bynta ki lanot.
Kum shi bynta ban tem ïa ka jinglong-jingman, ka GSU – Assam Zone ka la lum ïa ka jingïalang bad ka AAMSU lem bad kiwei-kiwei ki kynhun seng ka North Garo Hills.
Ha katei ka jingïalang, la ïashim bynta da ki dkhot jong ka AAYF, AIJIF, GSMC, AYWO, ADE, PJAC, AHAM, FAF, AYWS, Mothers’ Union lem bad ki nongïalam ka AAMSU. Hadien katei ka jingïalang, baroh arliang ki la poi sha ka jingmynjur ban ap ïa kaei ka ban mih na ka jingtohkit halor ka jingshah pynïap kitei ki 3 ngut.
“Ngi kwah ban kyrpad ïa baroh ban kiar na kaba pynsaphriang ïa ki khubor hamsaïa, dur khih, jingkren bad ban ong eiei haba ïadei bad katei ka jingjia. Kiba kum kine ki nang pynsniew dur arshah ïa ka jinglong-jingman bad pynthut ïa ka jingtohkit ban lap ïa ka jingshisha bad ban pynïoh ïa ka hok. Kaba nyngkong eh – ka long kaba sngewsih ba la duh noh ïa ki mynsiem briew. Ka jingpynïap ïa uno-uno u briew ka dei ka kam be-aiñ kaba hap ban pynrem jur,” la ong kitei ki kynhun seng ha ka kyrwoh.
Katei ka kyrwoh, haba pynkynmaw ba ka long kaba donkam ban kdew ba kitei ki lanot ki dei ki ‘riew shimet kiba don ïa ki mukotduma be-aiñ ba sahteng pyrshah ïa ki ha Assam, ka la ong ba ka jingduh noh ïa ki mynsiem briew ka dang dei hi ka kam kaba hap ban pynrem.
“To ngin ai lad ïa ki tnad bat aiñ ban ïaid shakhmat bad ka jingtohkit kaba bniah bad ban pyntikna ba kito kiba donkti kin shah pynshitom da kaba tyngeh katkum ka aiñ. Ngi dei ban ym pdiang ïa ka jingthmu ban pynkylla ïa kane ka jingjia sha ka kam sngewpher jaidbynriew. Ka jingkhang ïa ki surok ne ban pynkhluit halor ka jingsngewpher jaidbynriew, kan shu pynthut kai ïa ka jingtohkit bad pynslem ban pynïoh ïa ka hok. To ngin ïatylli lang halor ka jingdawa jong ngi na bynta ka jingtohkit kaba ïaid beit bad ka bym shah liang,” ong ka kyrwoh.
Haba kren halor katei ka jingïalang, u distrik President ka AAMSU – Goalpara distrik, u Aminul Hoque Choudhury u la ong ba ka jinglong-jingman ka long kaba suk ba saiñ bad ki kam khaïi ki la sdang biang kumba ju long.
Shuh shuh u la bynrap ba la dep phah ïa ki shithi sha ki Myntri Rangbah ka Meghalaya bad Assam kumjuh sha u Myntri ka tnad kam pohïing ka Sorkar Pdeng, u Amit Shah halor katei ka jingjia ban kyrpad na bynta ka hok jong ki lanot, ka jingpynsted ïa ka jingtohkit bad ka bai lut ksan na bynta jong ki.
