Guwahati, ïaïong:
U Myntri Rangbah jong ka Assam u Dr Himanta Biswa Sarma u la pynlong ïa kiba bun ki jingïalap ilekshon na ka bynta u kyrtong jong ka seng BJP u Suresh Bora ha ki lai tylli ki jaka ha Nagaon Parliamentary konstitwensi, ka ban sa long ha ka bynta kaba ar jong ka ilekshon ba dang ïaid shakhmat jong ka Lok Sabha ha ka 26 tarik, Ïaïong bad kyntu ïa ki briew ba kin ai ka jingkyrshan ïa u kyrtong jong ka seng BJP.
Ha kane ka sngi, u Dr Sarma u la ïashim bynta ha ki lai tylli ki jingïalap ilekshon ba la pynlong ha Nagaon Bhutaigaon, Raha bad Doomdooma hajan Batadroba bad ka la don ka jingpyrshah ïa ki kyrtong jong ka liang pyrshah ka Congress bad kumjuh jong ka AIUDF. Ha ka por ba u la ai jingkren ha ka jingïalang paidbah ha madan Bhutaigaon Bhutai Deka, u Dr Sarma u la pynshisha da kaba ong ba u kyrtong jong ka seng BJP u Suresh Bora un sa jop ha ka jingïakhun ïa ka ilekshon Lok Sabha ha kane ka por naba ki nongthep vote ha ka konstitewnsi ki la sakhi ïa ka jingtreikam kaba paw shabar bad kumjuh ki kam pynroi ha ka jylla bad kumjuh ha ka ri hi baroh kawei hapoh ka jingïalam jong u Myntri Rangbahduh u Narendra Modi.
Kum shi bynta ban tangon tyngeh ïa ka seng Congress, u Dr Sarma u la ong ba ha ka por jong ka jingsynshar ka seng Congress, ki kam pyntriem jong ki lehnoh, ki jingïakhih jong ki paidbah ne ki jingïakhih pyrshah ki la long ki dieng pyngkiang ïa ka roi ka par bad kumjuh ïa ki rukom pyntreikam. Nalor kane, ki jingïakynad paidbah ki la jia hapdeng ki riewngeit Hindu bad Muslim ha ka ri. Hynrei naduh ba ka seng BJP ka la wan ha ka bor synshar hapoh ka jingïalam jong u Narendra Modi, kiba kum kine kiei kiei baroh ki la jah lut, la bynrap u Dr Sarma.
