Shillong, Ïaïong 21
U President ka Voice of the People Party (VPP), Bah Ardent M. Basaïawmoit u la ai khublei ïa ki paidbah nongshong shnong ka Jylla kiba la mih ryntih ha ka 19 tarik mynta u bnai ban ïashim bynta ha ka ilekshon jied nongmihkhmat sha ka ïingdorbar thawaiñ Parliament jong ka ri.
“Ha ka kyrteng jong ka VPP, nga shim ïa kane ka kabu ban ai khublei kyrpang ïa ki paidbah ha ka ri kaba ieid eh jong ngi kiba la ïa mih ryntih ha ka sngi thep ‘vote’ na bynta ka ilekshon sha ka ïingdorbar Parliament ha kaba ki paidbah naduh dang step ki la ïa mih sha ki jaka thep ‘vote’ ban pyndonkam ïa ka hok jong ki ha ka ban jied ïa u dkhot sha ka ïingdorbar thawaiñ Parliament,” la ong u Bah Basaïawmoit.
U la ong ruh ba ym lah len ba ka ilekshon MP ha kane ka kynti ka la long ka ilekshon kaba shitrhem ha kaba ha kylleng ka ri ka seng ka la ïoh jingtip ba ki paidbah ki la mih ryntih.
Na ka liang u President u ai khublei kyrpang ïa baroh ki paidbah kiba la mih ryntih ha kane ka ilekshon jied nongmihkhmat thymmai sha ka Parliament bad khamtam eh ïa ki nongkyrshan jong ka VPP.
“Nga kitbok ïa ki ba kin ïoh ïa ka met ka phad kaba koit ba khiah, ha kajuh ka por ban ai mynsiem katba ngi dang ap khmih lynti ïa u soh uba bha uba ngin ïoh ban pdiang ha ka 4 tarik jong u Jylliew – ka sngi ban ñiew ïa ki ‘vote’,” u la ong.
Shuh shuh haba pynpaw ba ka jingaikhublei ka mih na ka dohnud jong ki nongïalam ka seng, u la bynrap, “Nga dap da ka jingkyrmen skhem ba ka 4 tarik kum ki nongkyrshan jong ka seng, ngin ïoh ban ïa kmen bad ban ainguh ruh ïa u Blei uba la don ryngkat ha ka jingïaid lynti jong ngi kum ka seng.”
