Shillong, Ïaïong 21
U Bah Avner Pariat uba dei u kyrtong ka VPP ha ka ilekshon MLA 2023 na East Shillong konstitwensi, u la ong ba ka seng Voice of the People Party (VPP) ka la beh seng ïa u khlem da pan jingshai ne jubab.
Haba ïakren bad u nongthoh khubor, u la ïathuh ba ha ka 16 tarik mynta u bnai u la pyntip sha ki katto-katne ki nongkitkam ba un mih noh na ka seng bad kiar shwa shipor na ka saiñ pyrthei namar ka saiñ pyrthei ka la sdang ban jaboh hynrei um kwah ban phah ïa ka jingthoh hapoh ka 19 tarik Ïaïong namar ka dang ïaid ka ilekshon.
U la ong ba kane ka shithi kaba u mut ban phah sha ki nongïalam ka long ba u pynpaw ba um kwah ban wanrah ïa ka saiñ pyrthei bad ka politik namar ym lah ban pynkhuid ïa ka politik da kaba pyndonkam ïa ka niam.
“Nga lyngngoh ba ha ka 20 tarik Ïaïong la mih pynban ba ki nongïalam ka VPP ki la beh seng ïa nga namar nga la kren pyrshah seng ha ki rynsan social media” u la ong.
U la ong ba ka VPP ka la dei ban pyni paidbah ïa kata kaba u la kren kynthoh ha social media ban ïa tip lut ki paidbah.
Nalor kata, u la ong ba kam don jingmut ban pyrshah ïa ka BJP ba ka pyndonkam da ka niam ha ka saiñ pyrthei, hynrei ïalade ki leh kumjuh.
Na ka liang u Bah Avner ha kawei ka liang u kyrshan ïa ka saiñ pyrthei kaba khuid, hynrei um kyrshan pat ban wanrah ïa ka niam ha ka saiñ pyrthei.
