Mawkyrwat, Ïaïong 21
Ar ngut ki khynnah kynthei na ka shnong Wahsiej ki la duh noh ei ïa la ka jong ka jingim ha ka Sngi U Blei hadien ba ki la ngam jyllop ha kawei ka thwei kaba dei ka jaka ba shait sei shyiap kaba tip kum ka thwei Brei-meirit ha Wah Rilang, Wahsiej, South West Khasi Hills.
Ïa kitei ar ngut ba la khlad la tip kyrteng kum ka Shabakmenlang Wanñiang, 16 snem ka rta, bad ka Aishabankmen Thongni, 14 snem ka rta. Kine baroh ar ngut ki dei na ka shnong Wahsiej.
Katkum ki tyllong khubor ba la ïohlum la ïathuh ba katei ka jingjia ka la jia ha ka por kumba 2:30 eiei nohphai sngi jong ka Sngi U Blei ha kaba saw ngut ki khynnah kynthei ki la leit sum sha wah namar ka jingshit jong ka sngi.
Ki tyllong khubor ki la ïathuh ruh ba hadien ba kitei ki khynnah ki la dep sum, kawei na kitei ki khynnah ka Shabakmenlang Wanñiang ka la leit ban jngi ha katei ka wah, hynrei kyndit-kynsan ka la ngam shapoh um.
Shuh shuh la ïathuh ba ka Aishabakmen Thongni mar ïa ïohi ba ka paralok jong ka, ka la ngam ha um, wut-wut ka la leit ban ïarap ïa ka. Hynrei namar ka jingjylliew jong ka um, ma ka ruh ka la shah tan lang shapoh bad baroh ar ngut ki la ngam jyllop ha katei ka wah.
Ha kaba ïadei bad katei ka jingjia na ka liang ki bahaïing hasem hadien ba la dep ban sei ïa ka met da ki briew na shnong, ki la kyrpad ban pyllait ïa ka ‘post mortem’ bad ïa ka met jong kitei ar ngut la aiti noh sha ki bahaïing hasem ba kin pyndep ïa ka niam ka rukom.
