Bengaluru, ïaïong:
Kumba la sakhi, ha Bengaluru ki la don kumba 123 tylli ki kali kiba la pynsah teng ban siew ïa ka kuna kaba la palat mat T. 1 lak.
Ka Bengaluru Traffic Police (BTP) ka la buh jingthoh ïa kumba 2,858 tylli ki kali, ha kaba mar kawei ki la shah daiñ kuna da mar T. 50,000 halor ka jingpynkheiñ ïa ki kyndon ha ki san snem ba la leit.
Kine ki kynthup ruh ïa lai tylli ki kali kiba la pynsahteng ban siew ïa ka kuna kaba long mar T. 2 lak.
Ka jingshah daiñ kuna jong ki kali ar shaka ka la kiew sha ka T. 2.91 lak na ka bynta ki 475 tylli ki jingpynkheiñ kyndon.
Ka jingdaiñ kuna baroh ka la kot sha ka T. 19,54,16,400 na ki 3,71,416 tylli ki jingjia.
Na ki 2,858 tylli ki kali, 2,742 tylli ki dei ki kali ar shaka, ha kaba baroh ki la don kumba 3,61,294 tylli ki jingjia, ha kaba la bud da ki 100 tylli ki kali da 8,603 tylli ki jingpynkheiñ kyndon, ha ryngkat ki Van, ki bos skul bad kiwei pat.
Kiba bun kiba la pynkheiñ kyndon ki dei ki nongñiah jong ki kali ar shaka naba kim ju deng ïa ki Helmet, kiba ïaid khlem ap ïa ka jingpynidak jong ki Traffic Signals bad ka jingbuh ïa ki Number Plate kiba thok.
Ki la don baroh kumba 3,12,727 tylli ki jingjia ïa kiba la shah pynngat ha ki kyndon kiba long pyrshah ïa ki nongñiah kali ar shaka bad kiba shong hadien jong ki naba kim ju phong ïa ki Helmet.
Ha ki kali, ki nongpynkheiñ kyndon kiba bun ki long ki bym deng ïa ki Seat Belt, kiba pyndonkam Mobile Phones katba ki dang ñiah kali bad kiba sangeh ha ki Zebra Crossing.
Ka Traffic Management Centre katkum ka jingbuh jingthoh ki la ong ba ki la don kumba 1,61,861 tylli ki jingpynkheiñ kyndon, katba ki Traffic Police jong ka Banaswadi ki la ïoh buh jingthoh da kumba 13,439 tylli ki jingjia ha kaba la ong ba kane ka la bun tam haba ïanujor bad kiwei pat ki jaka, ha kaba la bud da ka Banashankari, Pulikeshinagar bad ka Magadi Road Traffic Police.
U Joint Commissioner of Police (Traffic) u MN Anucheth u la ong ba ki la sdang ïa ka jingpyntreikam na ka bynta ban lum ïa ki kuna na kine ki nongpynkheiñ kyndon.
Ki pulit ki la leit ban jngoh ïa ki ïing jong ki nongpynkheiñ kyndon bad hukum ïa ki ba ki la dei ban siew noh ïa ka jingshah daiñ kuna kaba la sah la slem.
“Lada don ki bym lah ban siew ïa kane ka kuna, kin sa ngat ha ki jingshah mudui ha ka ïingbishar, bad yn sa phah ïa ki shithi ban khot hajir ïa ki. Ym shym la don ka jingmap ne ka jingpynduna ban siew ïa ka kuna na ka bynta ki nongpynkhieiñ kyndon,” u la bynrap.
