Imphal, ïaïong:
Ha ka por ba la pynlong ïa ka jingthep vote jong ka wat ba nyngkong jong ar tylli ki Manipur Parliamentary konstitwensi kaba la long ha ka Sngi Thohdieng, ki shipai ka tnat Assam Rifles (AR) ka la pynlong ïa ka jingleit pahara ha ki bynta khappud jong ka Chandel bad ka Churachandpur distrik kiba don ha Manipur kaba la pynlong ban ïoh kurup ïa ki tiar siat kynthup ki bom pynbthei, la ïathuh ki heh shipai.
Kum shi bynta ban pyntreiakm hadien ba la ïoh jingtip halor ka jingdon jong kine ki tiar siat bad ki kuli ha ka thaiñ kaba don hapdeng ka Halpi bad ka Saiphai, ha Chandel District (Manipur) kaba ïasam ïa ki bynta khappud bad ka Myanmar, ki shipai AR ki la pynlong ïa ka jingleit khynra bad ïoh ban kurup ïa kawei ka suloi AK-47 Rifle, ar tylli ki Mortar shan hi bad ki tiar hiar thma.
Ha ka bynta jong ka thaiñ Samulamlan, ha Churachandpur District (Manipur) kaba ïasam ïa ki bynta khappud bad ka Myanmar, ki shipai AR ha ryngkat ka jingïatreilang bad ka kynhun jong ki pulit ka Manipur ki la pynlong ïa ka jingleit ketkut bad ka jingleit thwet lehnoh ha ka 17 tarik, Ïaïong, 2024 bad ïoh ban kurup ïa lai tylli ki Single Barrel 12 mm Bore Rifles, kawei ka 9 mm Carbine Machine Gun bad u Magazine, kawei ka Tear Gas Gun, kawei ka Lathode Gun, ki kuli bad ki tiar ba pyndonkam ha ka ban hiar thma.
Ha kaba ïadei bad kajuh ka jingpyntreikam ha M Phaimol kaba ha Churachandpur District, ki shipai AR, bad ki pulit jong ka Manipur ki la ïoh ban kurup ïa kaei ka suloi .303 Rifle, saw tylli ki 12 mm Single Barrel Rifles, 2 tylli ki Improvised Heavy Mortars, ki kuli bad kiwei pat ki tiar hiar thma. Ïa kine ki tiar ba la ïoh ban kurup la aiti sha ki pulit jong ka Manipur.
Ha ka sngi Thohdieng, ka distrik Chandel bad ka Churachandpur ki la pynlong ïa ka jingthep vote na ka bynta ka Outer Manipur Lok Sabha konstitwensi kaba la mang na ka bynta ki Scheduled Tribes. Ki la don kumba saw ngut ki kyrtong kiba la ïakhun ha ka ilekshon.
